ٹائیفائیڈ کی علامات٬ بچاؤ اور ان کا علاج٬ ڈاکٹر مبینہ آگبٹوالہ

ٹائیفائیڈ ایک ایسی بیماری ہے جس کے مریضوں میں خطرناک حد تک اضافہ ہورہا ہے اور اسپتال میں موجود 50 فیصد مریض صرف ٹائیفائیڈ کے شکار پائے جاتے ہیں-درحقیقت اس مرض کی وجوہات انتہائی عام ہیں لیکن درست آگہی نہ ہونے کی وجہ سے اکثر لوگ آسانی سے اس کا شکار بن جاتے ہیں- ٹائیفائیڈ کیوں ہوتا ہے؟ اس سے کیسے محفوظ رہا جاسکتا ہے؟ اور اس کا علاج کیسے ممکن ہے؟ ان تمام اہم سوالات کے جوابات جاننے کے لیے ہماری ویب کی ٹیم نے معروف چائلڈ اسپیشلسٹ ڈاکٹر مبینہ آگبٹوالہ سے خصوصی معلومات حاصل کیں- ہم آج کے آرٹیکل میں ڈاکٹر مبینہ سے حاصل کردہ مفید معلومات قارئین کی آگہی اور شعور کے لیے ان کی خدمت میں پیش کر رہے ہیں-

ڈاکٹر مبینہ کے مطابق “ گرمیوں کی آمد کے سآتھ ہی ٹائیفائیڈ کے کیسز میں اضافہ ہوجاتا ہے- کچھ سال پہلے تک ٹائیفائیڈ صرف موسم گرما میں ہوتا تھا لیکن اب پورے سال ہی رہتا ہے“-
 

“ ہمارے ہاں اسپتال کے بستروں پر 50 فیصد مریض ٹائیفائیڈ کے پائے جاتے ہیں- ٹائیفائیڈ کی بیماری میں خطرناک حد تک اضافہ ہورہا ہے“-

ڈاکٹر مبینہ کا کہنا تھا کہ “ ٹائیفائیڈ کو پہلے مدت کا بخار کہا جاتا تھا- یہ بخار 1 ہفتے سے 10 تک رہتا ہے اور اس کا درجہ حرارت بہت زیادہ ہوتا ہے جو کہ نارمل پوزیشن پر آتا ہی نہیں ہے- یہ بخار 101 سے 103 کے درمیان رہتا ہے“-

“ والدین اپنے بچوں کو بخار اتارنے کے عام سیرپ دیتے رہتے ہیں جن سے بخار 98 یا 99 پر تو آتا ہے لیکن واپس بڑھ جاتا ہے“-

“ اگر ٹائیفائیڈ کا صحیح طریقے سے علاج نہ کیا جائے تو بہت سی پیچیدگیوں کا سامنا کرنا پڑ سکتا ہے“-

ڈاکٹر مبینہ کہتی ہیں کہ “ ٹائیفائیڈ میں بچے کی بھوک بالکل ختم ہوجاتی ہے٬ کچھ بھی کھانے کا دل نہیں کرتا٬ زبان پر سفیدی آجاتی ہے٬ منہ سے بو آنے لگتی ہے٬ الٹیاں اور متلی بھی محسوس ہونے لگتی ہے“-

“ اگر ٹائیفائیڈ بڑھ جائے تو اس کے ساتھ ڈائریا بھی ہوجاتا ہے اور پیٹ خراب ہوجاتا ہے- اس کے علاوہ پیٹ میں درد بھی ہوتا ہے“-

“ اگر ڈائریا کا صحیح نہ کیا جائے تو پیٹ میں موجود آنتوں میں سوزش ہوجاتی ہے اور چھوٹے چھوٹے السر بن جاتے ہیں- کبھی کبھی یہ السر پھٹ بھی جاتے ہیں جو کہ ایک جان لیوا بیماری ہے“-