عالمی ریکارڈ یافتہ انوکھے مقامات

رواں برس گنیز ورلڈ ریکارڈز کے قیام کو 60 سال مکمل ہوگئے ہیں۔ برسوں سے گنیز کے تحت دنیا بھر میں لوگوں اور مقامات کے حیرت انگیز اور عجیب و غریب عالمی ریکارڈز کو ہر سال ایک نئے ایڈیشن میں پیش کیا جاتا ہے۔ ایسے ہی گنیز بک آف ورلڈ میں شامل کچھ جگہوں، ممالک اور دیگر کے بارے میں موجود معلومات سے آج ہم آپ کو آگاہ کر رہے ہیں جو ڈان کی رپورٹ سے اخذ شدہ ہیں۔
 

سب سے زیادہ پلیٹ فارمز کا حامل ریلوے اسٹیشن
نیویارک کا گرینڈ سینٹرل ٹرمینل نامی ریلوے اسٹیشن 1903 سے 1913 کے درمیان تعمیر ہوا جس میں 44 پلیٹ فارمز موجود ہیں۔ گنیز بک آف ورلڈ ریکارڈ کے مطابق اوپری اور نچلی سیڑھیوں پر واقع 41 ٹریکس کے ساتھ ساتھ یہاں ایک خفیہ غیر استعمال شدہ پلیٹ فارم بھی موجود ہے جو والڈروف آسٹرویا کے نیچے واقع ہے۔

دنیا کی سب سے پتلی گلی
اس گلی میں گزرنا دبلے پتلے افراد کا ہی کام ہے موٹے افراد تو اس میں پھنس کر رہ جاتے ہیں کیونکہ اسے دنیا کی سب سے پتلی گلی کہا جاتا ہے جو محض 12.2 انچ چوڑی ہے۔ اس گلی کو4 1727 میں جرمنی کے روٹ لنگن نامی شہر میں بڑے پیمانے پر آتشزدگی کے بعد تعمیر کیا گیا تھا اور اب یہ گنیز بک آف ورلڈ ریکارڈ کا حصہ ہے۔

سرد ترین مقام
سربین گاﺅں اومائیاکون کو دنیا کا سرد ترین مقام مانا جاتا ہے۔ روس میں واقع اس گاﺅں میں سردیوں کے دوران اوسط درجہ حرارت منفی 55 ڈگری سینٹی گریڈ ہوتا ہے جبکہ یہاں سب سے کم درجہ حرارت 1933 میں ریکارڈ کیا گیا جو لگ بھگ منفی 68 سینٹی گریڈ تھا۔

سب سے قدیم نیشنل پارک
امریکا کا یلو اسٹون نیشنل پارک پہلا مقام تھا جسے سب سے پہلے ایک نیشنل پارک کا خطاب 1872 میں اس وقت کے امریکی صدر یولیسز ایس گرانٹ نے دیا۔ آج یہ پارک متعدد دنگ کردینے والی جگہیوں کا گھر ہے جن میں ملٹی کلر تالاب قابل ذکر ہیں۔

سب سے پرانا امیوزمنٹ پارک
ڈنمارک کا باککین نامی یہ امیوزمنٹ پارک کلامپینبورگ میں واقع ہے جسے 1583 میں کھولا گیا تھا اور یہ اب بھی کام کررہا ہے۔ اس پارک میں ڈیڑھ سو سے زائد لوگوں کی دلچسپی کے جھولے اور دیگر اشیاء موجود ہیں جن میں دنیا کی سب سے قدیم رولرز کوسٹرز میں سے ایک قابل ذکر ہے جو یہاں 1932 سے موجود ہے۔

دنیا کا سب سے چھوٹا ملک
ریاست ویٹیکن سٹی کو ایک خودمختار ملک سمجھا جاتا ہے اور اسے دنیا کی سب سے چھوٹا ملک کا عالمی ریکارڈ حاصل ہے جو 0.17 اسکوائر میل کے رقبے میں پھیلا ہوا ہے۔

غار میں بنا سب سے بڑا قلعہ
پریڈجاما کیسل یورپی ملک سلوانیہ میں واقع ہے جو ایک غاروں کے سلسلے کے دہانے پر تعمیر کیا گیا ہے، 13 ویں صدی کے اس قلعے کو 400 فٹ اونچائی پر تعمیر کیا گیا تھا اور یہ دنیا بھر کے سیاحوں کو اپنی جانب کھینچتا ہے۔

سب سے متحرک آتش فشاں
ہوائی کا کیلایو نامی آتش فشاں 1983 سے مسلسل لاوا اگل رہا ہے۔ اس کے مسلسل لاوا اگلنے کے عمل نے اسے ہوائی آنے والے سیاحوں کے لیے لازمی گھومنے کی جگہ بنا دی ہے۔