ہر شخص غذائی اجزا کی کمی کا شکار٬ دور کیسے ہو؟

متعدد غذائی اجزا انسان کی بہترین صحت کے لیے انتہائی اہم ہوتے ہیں اور ایک متوازن غذا کے ذریعے یہ اجزا حاصل بھی کیے جاسکتے ہیں- تاہم جدید غذاؤں نے انسان کو ان اہم ترین غذائی اجزا سے محروم کردیا ہے جس کی وجہ سے آج وہ کئی بیماریوں کا شکار دکھائی دیتا ہے- آج ہم آپ کو 7 ایسے غذائی اجزا کے بارے میں بتائیں گے جو ہیں تو انتہائی اہم لیکن ان کی کمی لوگوں میں عام پائی جاتی ہے- تاہم یہاں چند ایسی غذاؤں کا بھی ذکر کیا جارہا ہے جنہیں استعمال کر کے غذائی اجزا کی کمی کو دور کیا جاسکتا ہے-
 

آئرن کی کمی:
آئرن کی کمی لوگوں میں عام پائی جاتی ہے اور یہ سب سے زیادہ خواتین اور بچوں میں عام ہے- آئرن کی کمی انسان میں تھکن٬ کمزوری٬ نظام ہضم میں خرابی اور دماغی نظام میں خرابی کی وجہ بنتی ہے- لیکن اس کی کمی کو دور کرنا بھی مشکل نہیں- اس کے لیے آپ کو چاہیے کہ آپ اپنی روزمرہ کی خوراک میں٬ گوبھی٬ پالک٬ لوبیا٬ گوشت اور کدو کے بیج ضرور شامل کریں اور مختلف اوقات میں ان غذاؤں میں سے کسی نہ کسی غذا کا استعمال کرتے رہیں-

آئیوڈین کی کمی:
آئیوڈین کی کمی بھی دنیا بھر میں عام ہے- لیکن اس کی کمی صحت کے کئی بڑے مسائل کو جنم دے سکتی ہے جیسے کہ یہ انسان کو تھائیرائیڈ کا شکار بنا سکتی ہے- آئیوڈین کی کمی کی وجہ سے انسانی جسم میں موجود تھائیرائیڈ بڑھنے لگتا ہے اور اس کے ساتھ ہی کئی دیگر بیماریاں بھی جنم لینے لگتی ہیں- اس کے علاوہ آئیوڈین کی کمی کی وجہ سے بچوں کا دماغ بھی سست روی کا شکار ہوجاتا ہے اور وہ بڑھتی عمر کے ساتھ نشو و نما نہیں پاتا- اس کمی سے بچاؤ کے لیے ضروری ہے کہ آپ اپنی خوراک میں انڈے٬ مچھلی اور ڈیری مصنوعات کو ضرور شامل رکھیں-

وٹامن ڈی کی کمی:
وٹامن ڈی کی کمی بھی لوگوں میں بہت عام پائی جاتی ہے- اس کی علامات یہ ہے کہ انسان کے مسلز کمزور پڑ جاتے ہیں اور ہڈیاں بھی کمزور ہوجاتی ہیں- اس کے علاوہ فریکچر کے خطرات میں بھی اضافہ ہوجاتا ہے یعنی جب ہڈیاں نرم پڑتی ہیں تو ہلکی سی ٹھوکر یا ٹکراؤ بھی ہڈی ٹوٹنے کا باعث بن جاتا ہے- تاہم مشکل یہ ہے کہ صرف ایک خوراک سے ہی وٹامن ڈی کی کمی کو دور نہیں کیا جاسکتا- اس کے لیے ضروری ہے کہ آپ انڈے کی زردی کھائیں اور ساتھ ہی ٹراؤٹ مچھلی بھی ضرور استعمال کریں-

وٹامن بی 12 کی کمی:
اس وٹامن کی کمی تو لوگوں میں بہت زیادہ عام پائی جاتی ہے بالخصوص بزرگ افراد تو اکثر اس کمی کا شکار نظر آتے ہیں- اس کی علامات یہ ہے کہ انسان کا خون خراب ہونے لگتا ہے جبکہ دماغ بھی کسی حد تک کام کرنا چھوڑ دیتا ہے یا پھر کمزور پڑ جاتا ہے- وٹامن بی 12 کی کمی کو دور کرنے کے لیے ضروری ہے کہ آپ اپنے خوراک میں انڈے٬ گوشت اور دودھ تیار کی جانے والی مصنوعات کا استعمال ضرور کریں-

کیلشیم کی کمی:
کیلیشم انسانی جسم کے لیے انتہائی اہم ہے لیکن بدقسمتی اس اکثر لوگوں میں اس کی بھی کمی دکھائی دیتی ہے- کیلشیم ہماری ہڈیوں اور دانتوں کو مضبوط بناتا ہے- تاہم ہم ایسی خوراک کا استعمال کم ہی کرتے ہیں جن میں کیلشیم کی بھاری مقدار پائی جاتی ہے- کیلشیم کی کمی ہمیں زیادہ تر نوجوان خواتین یا پھر بزرگ حضرات میں دکھائی دیتی ہے- لیکن پریشان ہونے کی ضرورت نہیں کیونکہ اس کمی کو دور کرنا بھی مشکل نہیں اس کے لیے بس آپ کو اپنی روزمرہ کی خوراک میں ڈیری مصنوعات یعنی دودھ دہی سی بنی اشیا اور گہرے سبز رنگ کی سبزیوں کا استعمال کرنا ہوگا- ان سبزیوں میں پالک اور پھول گوبھی قابلِ ذکر ہیں-

وٹامن اے کی کمی:
وٹامن اے ہماری جلد کو صحت مند بناتا ہے اور ساتھ ہی دانتوں اور ہڈیوں کی صحت کے لیے بھی مددگار ثابت ہوتا ہے- لیکن افسوس کی بات یہ ہے کئی ترقی پذیر ممالک کے باشندوں میں اس وٹامن اے کی کمی پائی جاتی ہے- وٹامن اے کی کمی بعض اوقات آنکھوں کو بھی نقصان پہنچاتی ہے یہاں تک کہ انسان کی بینائی بھی چلی جاتی ہے- اس کمی سے بچاؤ کے لیے ضروری ہے کہ آپ گاجر٬ شکر قندی اور ہری سبزیوں کا استعمال ضرور کریں- اس کے علاوہ مچھلی بھی وٹامن اے کا حصول کا ایک بہترین ذریعہ ہے-

میگنیشیم کی کمی:
میگنیم ہمارے جسم کے لیے سب سے اہم ہے- اکثر لوگ کی خوراک میں میگنیشم انتہائی قلیل مقدار میں موجود ہوتا ہے جبکہ سب سے زیادہ مغربی ممالک کے باشندے اس کی کمی کا شکار ہوتے ہیں- میگنیشم کی کمی کئی بیماریوں کی دعوت دیتی ہے- لیکن اس کمی کو دور کرنا بھی کوئی مشکل نہیں- اگر آپ اپنی خوراک میں ہر طرح کے اناج٬ بادام٬ ہری اور پتے والی سبزیوں اور چاکلیٹ کا استعمال کریں گے تو آپ میگنیشم کی کمی سے محفوظ رہ سکتے ہیں-