پشاور: چوہے نے بچے کی جان لے لی اور اس سے قبل---

گزشتہ روز صوبہ خیبرپختونخوا کے مرکزی شہر پشاور میں ایک چوہے نے 8 ماہ کے بچے کی جان لے لی- سال 2010 میں آنے والے سیلاب کے بعد یہاں چوہوں کے تعداد میں بےپناہ اضافہ ہوچکا ہے اور اس سے قبل بھی یہ چوہے 5 بچوں کی جان لے چکے ہیں-
 

قاری خالد کے مطابق چوہے نے اُن کے بیٹے حذیفہ کو چہرے اور ناک پر کاٹا جس سے وہ شدید زخمی ہوگیا اور یہ تمام واقعہ اس دوران پیش آیا جب وہ دن بھر کی تھکان کے بعد رات کو گہری نیند سو رہے تھے.

قاری خالد کا کہنا تھا کہ “ مجھے اس واقعے کا اس وقت علم ہوا جب صبح میں نے اپنے اکلوتے بیٹے حذیفہ کو خون میں لت پت دیکھا جبکہ ایک بڑی جسامت کے حامل چوہے کو کمرے سے نکلتے ہوئے دیکھا“-

“ میں فوراً بیٹے کو لے قریبی اسپتال پہنجا تاہم ڈاکٹروں نے اس کی موت کی تصدیق کردی“-

ایک مقامی شخص مالک کا کہنا تھا کہ “ علاقے میں بڑی جسامت کے حامل چوہے پائے جاتے ہیں اور سال 2010 میں آنے والے سیلاب کے بعد ان چوہوں کی تعداد میں اضافہ ہوا ہے٬ یہ چوہے بلیوں سے بھی نہیں ڈرتے“-
 

“ اس سے قبل بھی یہ چوہے کئی بچوں کو کاٹ چکے ہیں اور اب ہم اپنے بچوں کو گھروں میں تنہا نہیں چھوڑ سکتے جبکہ اس مسئلے کے حوالے سے مقامی حکومت کو کئی بار درخواست بھی دی جا چکی ہے لیکن وہ اس جانب کوئی توجہ نہیں دیتی“-