عالمی موسمی تغیرات کے اثرات پاکستان میں ظاہر ہونا شروع ہو گئے

 موسمی ماہرین کے مطابق شمالی کرہ ارض میں اس سال گزشتہ 125 سال میں موسم سرما گرم ترین رہا ہے دسمبر 2006 ء سے فروری 2007 ء تک زمین اور سمندر کا مجموعی درجہ حرارت اوسط سے 1.3 ڈگری فارن ہائیٹ زیادہ تھا۔ ماہرین کا کہنا ہے کہ دنیا بھر میں ہر عشرے کے د وران درجہ حرارت اعشاریہ دو کی حد سے بڑھ رہا ہے اور موجودہ صدی کے اختتام تک دنیا کا درجہ حرارت 1.8 سنٹی گریڈ سے چار ڈگری سنٹی گریڈ تک بڑھ سکتا ہے جس کی وجہ سے برفانی گلیشئر پگھل کر سمندروں میں طوفان اور ساحلی شہروں کی تباہی کا سبب بن سکتے ہیں ۔

 درجہ حرارت میں اضافے سے قطبین پر موجود گلیشیر وں کے پگھلنے کا عمل تیز ہوگیا ہے جس کی وجہ سے مستقبل قریب میں سمندروں کی سطح میں اضافہ ہو سکتا ہے ۔ گلیشیر سالانہ 33 سے 49 فٹ تک پگھل رہے ہیں ۔ ریجنل ڈائریکٹرمحکمہ موسمیات محمد رفیق نے ’’ اے پی پی ‘‘ کے نمائندہ کو بتایا کہ سال 2000 تک عالمی حدت میں اعیشاریہ آٹھ سنٹی گریڈ فی ایک سوسال کے حساب سے اضافہ ہوا ہے۔ انہوں نے کہا محکمہ موسمیات پاکستان میں عالمی معیار کے مطابق موسم کی پیشن گوئی کرنے کا موثر نظام موجود ہے اور سیٹلائٹ کے ذریعے موسمی تبدیلیوں سے متعلق تمام تر اعداد و شمار جمع کئے جاتے ہیں ۔ انہوں نے کہا کہ تقریباً 20 کروڑ روپے کی لاگت سے کراچی میں جدید ترین سونامی وارننگ سنٹر قائم کیا جارہا ہے جو آئندہ دوسالوں کے دوران مکمل کرلیا جائے گا۔ یہ سنٹر سمندر میں سونامی کی بروقت پیشنگوئی اوراطلاع فراہم کرے گا ۔ انہوں نے کہا کہ اس منصوبے کے تحت پشاور اور کوئٹہ میں ریجنل سنٹر قائم کئے جائیں گے جو ایک نیٹ ورک کے ذریعے کراچی کے مرکزی سنٹر سے منسلک ہوں گے ۔ محکمہ موسمیات کے ڈپٹی ڈائر یکٹر مشتاق علی شاہ نے ’’ اے پی پی ‘‘ کو بتایاکہ عالمی سطح پر موسمی تغیر کے اثرات گزشتہ چند سالوں سے پاکستان پر ظاہر ہونا شروع ہوگئے ہیں جس میں موسموں کا غیر معمول رہنا ، خشک سالی ، غیر معمولی بارشوں کا ہونا وغیر ہ شامل ہیں ۔ انہوں نے کہا کہ موسم شدید ترہوتے جارہے ہیں ۔
 
سردیوں میں سر دترین موسم اور گرمیوں میں موسم گرم ترین ہورہا ہے ۔ 1997 ء سے سال 2003 ء تک ملک میں خشک سالی رہی جبکہ گزشتہ اور موجودہ سال سردیوں میں معمول سے زیادہ بارشیں ریکارڈ کی گئیں ۔ مشتاق علی نے کہا موسمی تبدیلیوں کی وجہ سے اس سال ماہ جنوری میں پاکستان میں معمول سے زیادہ برف باری ہوئی ۔ فاٹا کے علاقے پارا چنار میں عام طور پر موسم سرما میں درجہ حرارت منفی آٹھ ڈگری سنٹی گریڈ تک رہتا ہے جبکہ اس سال یہاں درجہ حرارت منفی 12 ڈگری سنٹی گریڈ تک ریکارڈ کیا گیا جو مسلسل ایک ہفتہ بر قرار رہا ۔ انہوں نے کہا اسی طرح صوبہ سرحد کے علاقوں کالام اور مالم جبہ میں بھی موسم سرما سرد ترین ریکارڈ کیاگیا ہے ۔ انہوںنے کہا کہ پاکستان کے شمالی علاقوں میں موسم سرما میں عموماً پانچ سے چھ فٹ برف باری ہوتی ہے جبکہ اس سال بعض مقامات پر آٹھ فٹ تک بر ف باری ریکارڈ کی گئی ہے ۔ انہوں نے کہا کہ پاکستان میں بارشوں کے معمول میں بھی تبدیلی آرہی ہے ایک لمبا دورانیہ خشک رہنے کے بعد اچانک سے بارشوں کا سلسلہ شروع ہو جاتا ہے جو وقفے وقفے سے کئی دن تک جاری رہتا ہے ۔ انہوںنے کہا کہ موسمی تبدیلیوں کے حوالے سے محکمہ موسمیات نے ملک کے دیگر محکموں کے ساتھ مسلسل رابطے قائم کر رکھے ہیں جن میں محکمہ زراعت ، محکمہ آبپاشی، محکمہ صحت کے علاوہ مختلف ائیر لائنز اور ٹر انسپورٹ کمپنیاں شامل ہیں جنہیں باقاعدہ طورپر موسم کی رپورٹ دی جاتی ہے-