بچوں کی حفاظت - انتہائی اہم تدابیر و احتیاط

آپ کی ذرا سی بے پروائی بچے کی زندگی کو خطرے میں ڈال سکتی ہے
 

درج ذیل واقعات پر ایک نظر ڈالیں- پھر بچوں کے حادثات کے سلسلے میں ہمیں کیا تدابیر کرنی چاہییں اس پر گفتگو یقیناً مفید ثابت ہوگی- یہ بات بھی ذہن میں رکھ لیں کہ امریکا جیسے ترقی یافتہ اور تعلیم یافتہ ملک میں 25 لاکھ بچے شدید زخمی ہوتے یا بعض صورتوں میں موت کا شکار ہو جاتے ہیں- پاکستان میں بہت محتاط اندازے کے مطابق ان کی تعداد پانچ لاکھ تک ہے- پاکستانی ایک خاتون نے کھولتا پانی ٹب میں ڈالا٬ بچہ کو پانی کے قریب چھوڑا اور کسی اشد ضرورت کے لیے مشکل سے پانچ منٹ کے لیے باہر گئیں٬ واپس آئیں تو بچہ اس کھولتے پانی میں گر کر مر چکا تھا- ماں یہ صدمہ برداشت نہ کر سکی اور وہ بھی چل بسی-

میرے ایک دوست بریگیڈیر اصغر میاں نے دل برداشتہ ہو کر بتایا کہ بچہ ڈیڑھ فٹ کی اونچائی سے اس طرح گرا کہ دماغی چوٹ کی وجہ سے اس کی بینائی جاتی رہی-

ایک بچی اپنی سہیلی کے ساتھ گھر کے لان میں گئی- باغ میں خوبصورت بتیاں لگی ہوئی تھیں- یہیں کھیلتے ہوئے ایک تار پکڑ لیا اور بجلی کے جھٹکے سے دنیا چھوڑ گئی-

خانہ دار خواتین کسی احتیاط کی قائل نہیں ہوتیں٬ انہیں گھر کی ساری ذمے داری سونپ کر اہل خانہ بالخصوص مرد حضرات بچوں سے بالکل الگ تھلگ ہو جاتے ہیں- ایسی ایک خاتون فرش پر کپڑا بچھا کر استری کر رہی تھیں کہ کسی نے آواز دی- استری چھوڑ کر اس طرف چل دیں- میری پوتی جو ابھی دو سال کی تھی٬ آئی اور اس نے استری کو پکڑنا چاہا- بس وہ استری چپک گئی اور انگلیاں جل گئیں-

کتنے ہی بچے ماں باپ کے بے انداز پیار سے یا ان بچوں کے ماموں حضرات اور چچا صاحبان کی شفقت کی وجہ سے معذوری کی زندگی گزار رہے ہیں- یہ لوگ بعض اوقات اپنے پیار کا اظہار کرنے کے لیے ان کے ساتھ کھلونوں کی طرح کھیلنے لگتے ہیں- اچھال اچھال کر گود میں لینے کا تماشہ کرتے ہیں اور جب بچہ کسی وقت نہ سنبھل پائے اور فرش پر گر جائے تو اس کے کیا نتائج ہو سکتے ہیں٬ یہ آپ خود سوچ لیں-

یہ بہت ضروری ہے کہ پنگوڑے سے پانچ سال کی عمر تک کے بچوں کو گرنے اور حادثات سے محفوظ رکھنے کی باقاعدہ کوشش کی جائے- حادثات کے علاوہ یہ ضروری ہے کہ مائیں اس بات کو یقینی بنائیں کہ تمام حفاظتی ٹیکے باقاعدہ شیڈول کے مطابق لگوائے جائیں- باوجود اس کے کہ اب اکثر شہری مائیں ایسا کر رہی ہیں اور ان کو اس بات کا شعور ہے٬ پھر بھی بہت سی مائیں بے پروا ہوئی ہیں- پولیو کے قطرے ایک پروگرام کے مطابق پلائے جا رہے ہیں- خواتین یا مرد گھر پر آئی ہو سہولت کو یہ کہہ کر نہ ٹال دیں کہ بچہ گھر پر موجود نہیں ہے- اس سے بچے کی آئندہ زندگی میں بڑا نقصان ہو سکتا ہے- ایسا کیوں ہو گیا کہ چھوٹے چھوٹے شہروں میں رہنے والی مائیں جن کی آمدنی بھی خاصی حد تک مناسب ہے٬ وہ بچوں کو اپنا دودھ نہیں پلاتیں- شہروں کی خواتین کے گھروں میں 80 فیصد بچے پاؤڈر کے دودھ پینے پر مجبور ہیں- سب جانتے ہیں کہ ماں کا دودھ بچوں کے لیے از بس ضروری ہے اور اس کے فائدے ہی فائدے ہیں-
 

میں نے اس سلسلے میں کئی جگہ بات کی٬ جواب ملا کہ ورکنگ وومن کے لیے دودھ پلانا ممکن نہیں- اس کی زندگی کی ترجیحات مختلف ہیں- کچھ کا کہنا ہے کہ دودھ پلانے کے لیے وقت درکار ہے اور آج کی مصروف اور تیز رفتار دنیا میں ماں کے پاس وقت نہیں- یہ کام آسان ہے کہ نوکرانیوں کے ذریعے بچوں کو بوتل میں دودھ دے دیا جائے- اکثر کا کہنا یہ ہے کہ دودھ کم اترتا ہے- بچہ بھوکا رہ جاتا ہے٬ اب ترقی کا دور ہے آج بچہ ہسپتال میں ہے اور دوسرے دن بچے کے ساتھ ماں گھر پر اور تیسرے دن سے ماں گھریلو کام کے لیے ہمہ وقت موجود ہو- بڑی بوڑھیاں زچگی کے دس پندرہ دن تک ماں کو کام کرنے نہیں دیتی تھیں- اس کی غذا اور سہولت کا بہت خیال رکھا جاتا تھا-