مقیم اثر ؔبیاولی…نوتراشیدہ ترکیبوں کا مجتہدشاعر اور نثّار

(Dr. Muhammed Husain Mushahi Razvi, Malegaon)

مقیم اثر بیاولی

مقیم اثر ؔبیاولی…نوتراشیدہ ترکیبوں کا مجتہدشاعر اور نثّار
ڈاکٹر محمد حسین مُشاہدؔ رضوی
آج مجھے ٹھکرادو گے لیکن کل تم خود مانوگے
اپنے لب و لہجے کا اثرؔ سب سے نرالا شاعر تھا
نیا ملبوس بخشا ہے مری فکروں نے لفظوں کو
نئے ہونٹوں کی جانسوزی نئے لفظوں کی جھولی ہوں
(مقیم اثرؔ)
اردو میں ما بعد جدید نظریہ کے حامل شاعروں میں اپنی منفرد خصوصیات،اچھوتی اور نرالی نگارشات اور نوتراشیدہ لفظی ترکیبات کے سبب مقیم اثرؔ بیاولی ثم مالیگانوی کا نام ممتاز اور نمایاں مقام و منصب پر فائز ہے۔آپ ادارہ رسیدہ روایتی ترقی پسندی،فیشن زدہ روایتی جدیدیت پسندی، کوتا ہ رسیدہ اشتراکیت پسندی کے فرقہ وارانہ تعصبات کے خول سے ماورا ہمہ جہت و ہمہ گیر بلکہ عالمگیر و آفاقی روحانیت پسند،اخلاقیت پسنداور فطری انسانی بصیرت و بصارت کے حامل سکندرانہ اداوں اور قلندرانہ جلال کے امیٖن ایک اچھے اور سچے شاعر ہونے کے ساتھ ساتھ بلند پایہ انشاپرداز اور مایۂ ناز نثر نگار بھی ہیں۔بقولِ نظام صدیقی :
’’ پچاسوںدیوانوں کادیوانہ شاعر…مقیم اثرؔ کا مابعدجدیدتخلیقی شعری کردار اکیسویں صدی کو محیط وہ برق رَومعانی آفریں،جہت نما،روشن سفر ہے ،جو بھٹکی ہوئی غزل اور نظم کا قبلہ درست کردے گا۔‘‘
مقیم اثرؔ کی شاعری کے موضوعات متنوع اور گوناگوں،ہمہ گیر وہمہ جہت ہیں۔آپکی شعر کائنات کے موضوعات کا دائرہ آدمی، زندگی، زمانہ، کائنات، خالقِ کائنات، فطرت کے گہرے حقائق، جبرواختیار، مقامِ آدمیت، منصبِ رسالت، عقیدے سے گہری وابستگی، قضاوقدر، جذباتی بے رشتگی سے پیداشدہ تنہائی، سماجی بے گانگی، لایعنیت، احساسِ زیاں، احساسِ نا تکمیلیت، لاحاصلی، یاسیت، لاحاصلی، دردوغم، شعلہ فگنی، احتجاج، انحراف، جلال، جمال، عاشقی، رندی، سرمستی، آلامِ روزگار، دعاے بزرگاں، جفاے دوستاں، آزارِ دشمناں، اعترافِ حقیقت، پابندیِ وقت، غمِ ذات، غمِ کائنات، اقدار کی پامالی، مادیت کے فروغ سے بڑھتے جرائم وغیرہ کو اپنی وسعتوں میں محیط کرتا ہے۔
آپ کا کلام ہر نوعیت کی تحریک شکنی،میلان شکنی،ساخت شکنی،اسلوب شکنی،لفظیات شکنی،نحویات شکنی اور صوتیات شکنی سے مملو ہے ۔تاہم بیک وقت خوب تر، نئی اور البیلی ،اچھوتی اور نرالی صوتی تخلیقیت،صرفی تخلیقیت،نحوی تخلیقیت،معنوی تخلیقیت،عروضی تخلیقیت اور بدیعی تخلیقیت کی امیٖن ہے،جو اپنے آپ میں مثالی بھی اور بے مثالی بھی…
ذیل کی غزل سے ہمار ایہ دعویٰ مکمل طور پر مترشح ہوتا ہے ۔اس میں طرزِ اظہار کا انوکھا بانکپن اور اسلوب کی جدت و ندرت یہ ہے کہ ہر شعر کے دوسرے مصرعے کے شروع میں ہم قافیہ الفاظ کا ادیبانہ مہارت سے استعمال کیا گیا ہے جس کے سبب آہنگ درونِ آہنگ وجود میں آیا ہے،اسلوب کا یہ نرالا پن مقیم اثرؔ کے علاوہ کہیں اور نظر نہیں آتا ؎
سر بُریدہ خداوں کی پہچان کیا
نم ، نمیدہ ہواوں کی پہچان کیا
کِشت لاحاصلی ، یاسیت درد و غم
ناشنیدہ دعاوں کی پہچان کیا
کٹ کے سورج سے نذرِ ہوا ہوگئیں
غم رسیدہ شعاوں کی پہچان کیا
دیدہ و دل کی حیرانیاں برف زار
دیدہ ، دیدہ اداوں کی پہچان کیا
نیل کی موج پر حکم فرعون کا
پر بُریدہ عصاوں کی پہچان کیا
کاسۂ ہر طلب ، گنجِ گوہر طلب
آفریدہ صداوں کی پہچان کیا
گل سے چہرے ترس جائیں مسکان کو
آرمیدہ بلاوں کی پہچان کیا
ہر بدن دھوپ کے پیرہن سے جلے
آبدیدہ اداوں کی پہچان کیا
ایک اک حرف ہے مقتلِ آرزو
خط کشیدہ صلاوں کی پہچان کیا
کاسۂ سے سے فکرِ رسا چھین لیں
برگزیدہ سبھاوں کی پہچان کیا
سربُریدہ، نم نمیدہ، ناشنیدہ، غم رسیدہ، پربُریدہ، آفریدہ، آرمیدہ، آبدیدہ، خط کشیدہ، برگزیدہ ہم قافیہ الفاظ ہیں۔ ان کے علاوہ دعاوں،خلاوں،فضاوں،عصاوں،اداوں وغیرہ قافیے تو ہیں ہی۔اس طرح ایک ہی غزل میںدو الگ الگ قوافی کی وجہ سے پوری غزل میں بڑی دلکش صوتی،نحوی،عروضی اور بدیعی نغمگی پیدا ہوگئی ہے۔جو شاعر کی فنکارانہ چابکدستی اور ادیبانہ مہارتِ تامہ پر دال ہے۔
مقیم اثرؔ کے کلامِ بلاغت نظام کو پڑھنے کے بعد قاری رو شناسی سے آگے روح شناسی کے جذبات سے ہمکنار ہوکر خود شناسی اور خدا شناسی کا شعور وادراک لے کر اُٹھتا ہے۔وہ مادّیت پسندی کے خول سے نکل کر روحانیت پسند بن جاتا ہے اور اسے مَن عَرَفَ نَفْسَہٗ فَقَدْ عَرَفَ رَبَّہٗ کا عرفان حاصل ہوتاہے،قاری مقامِ بشر و رسول سے بھی واقف ہوتا ہے،مقامِ آدمیت کی عظمت و رفعت کا ادراک بھی اسے ہوتا ہے اور وہ خود آگہی،کائنات آگہی سے آگے بڑھ کر خدا آگہی کے آفاقی تصورات سے ہمرشتہ ہوتے ہوئے اپنی حقیقت و ماہیت کو پہچان کر احساس وشعور میں جذباتی طہارت،جمالیاتی پاکیزگی اور روحانی ترفُّع پیدا کرتا ہے ؎
ارض و سما سے اونچا اپنا مقام ہوگا
دل کو حرم بنا لو کعبہ غلام ہوگا
جب ہم نے درد و کرب کی سرحد عبور کی
معلوم یہ ہوا کہ ہمیٖں میں خدا بھی ہے
یہ فیض اس کا خطاوں سے چشم پوشی کی
میں بد گماں تھا مگر آسرا دیا اُس نے
وہی فراق ، وہی جستجو ، وہی کاوش
چھپا اشارۂ ہجرت شبِ وصال میں ہے
کھلی جو چشمِ بصیرت تو میں نے یہ دیکھا
نئے عروج کا آغاز ہر زوال میں ہے
دل کے جھکنے کی خبر ہو پھر نہ سر کٹنے کا ہوش
ایک سجدہ ہو اگر ایسا جسے سجدہ کہوں
جس میں تیرا غم نہیں وہ دل نہیں کچھ اور ہے
کیسے خالی قبر کو راحت گہہ تقویٰ کہوں
کس لب پہ کس زباں پہ نہیں اس حسیٖں کی بات
جس نے غزل کو حُسنِ دوعالم عطا کیا
پہلے لازم ہے کہ ہستی کو سمجھ لے انساں
آدمی پھر کسی ہستی کا پرستار بنے
نیکیاں ہیں مری کہ تیرا خیال
راہ میں دور تک اجالا ہے
اسی کا رنگ مری حسرتوں کے قالب میں
بدن رُتوں میں مہکتا خطاب بھی وہ
رنگ بدلتے روپ بدلتے چہروں میں
کوئی تو ایسا ہو جس کو یاد کروں
اپنی توقیر کو دفنانا پڑے گا مجھ کو
اپنے ہونٹوں سے اگر اپنی ہی تحقیر کروں
واقف نہیں جو منزلِ راہِ سلوک سے
وہ بے اثر ، اثرؔ کو اثر مانتے نہیں
سب کے دامن سے چھٹے ہم تو یہ معلوم ہوا
سب کے دامن سے کُشادہ ہے خدا کا دامن
ہے اگر معنیٰ کی خوشبو تجھ میں لفظوں میں اُتر
پہلے اپنی جاں کا عارف بن تو غزلوں میں اُتر
متذکرہ بالا اشعار تصوفانہ رنگ و آہنگ ڈھلے اور عارفانہ رنگ سے مملو ہیں۔جو مَن عَرَفَ نَفسَہٗ فَقَد عَرَفَ رَبَّہٗ کے شارح نظر آتے ہیں۔
اسی طرح مقامِ رسول ودیارِ رسول(ﷺ)کا یہ انداز مقیم اثرؔ کے بارگاہِ رسالت مآب ﷺکے ادب واحترام کے تئیں حزم و احتیاط کو جلوہ دکھاتاہے۔
یہ بارگاہِ نبی ہے نہ تیز کر لَے کو
نہ سر اُٹھا کہ ادب میں یہی کھلا شر ہے
بشر تو خیر بشر ہے بشر کا دعویٰ کیا
کوئی بتائے کہ نبیوں میں اُن کو ہمسر ہے
تو وہ کعبہ ہے کہ کعبہ تری تعظیم کرے
جلوۂ حق ہے سراپا ہمیں تن من تیرا
ہوئی حقیقتِ مطلق سے گفتگو جس کی
وہ امتوں میں بشیر و نذیر ہوتا ہے
وہیں کے نُور سے پھیلے گی روشنی گھر گھر
زمانہ لاکھ رکھے دشمنی مدینے سے
مقیم اثرؔنے اپنے اشعار میں تشبیہات، استعارات، اشارات، کنایات، محاورات، علامات، تلازمات،محاکات اور پیکرات کے جِلَو میں نو تراشیدہ اور خود وضع کردہ ترکیباتِ لفظی کا جو نگار خانۂ رقصاں آراستہ و مزین کیا ہے اور ان ترکیبات کو روایتی شعری لفظیات میں مدغم کرکے جس منفر د اور اچھوتے انداز میں برتا ہے وہ اردو کے دیگر شاعروں کے یہاں تلاشِ بسیار کے باوجود نظر نہیں آتا۔یہ شعری لفظیات اور نوتراشیدہ ترکیبات بظاہر سادہ معلوم ہوتی ہیں لیکن معنی آفرینی،مضمون آفرینی،جدتِ ادا،طرزِ ادا کے بانکپن،شوکتِ لفظی،بندش و چستی اور ندرتِ بیان کا ایک بحرِ بیکراں اپنے اندر سموئے ہوئے معلوم ہوتے ہیں۔جن سے مقیم اثرؔکی انفرادی اور امتیازی رفعت و عظمت مترشّح ہوتی ہے۔ان نوتراشیدہ ترکیباتِ لفظی کو ’’مقیم اثری مجتہدانہ کاوش‘‘ سے تعبیر کیا جاسکتا ہے۔یہ ایک سچائی ہے کہ مقیم اثرؔ ایک ایسا فنکار ہے جو ہر لمحہ نئی بات کی کھوج میں لگا رہتا ہے،خود کہتے ہیں ؎
نہ کہی ہوئی نہ سُنی ہوئی ، نہ پڑھی ہوئی نہ لکھی ہوئی
کسی ایسی بات کی کھوج میں ہے اثرؔ تمہارا لگا ہوا
مقیم اثرؔ کا شعری و ادبی سفر ’’لاتقنطوا‘‘ سے شروع ہوتا ہے ۔یہاں آپ نے یاسیت اور ناامیدی کے چاہِ عمیق میں امید و بیم کا آبِ شیریں بہایا ہے۔ یہ مجموعہ آپ کے ادبی وفنی جمالیات اور حسی و ادراکی جذبات واحساسات کا اوّلین نقش ہے،لیکن اس میں بچکانہ فہم و فراست اور طفلانہ شوخی کا کہیں بھی شائبہ نظر نہیں آتا۔مکمل طور پر لا تقنطو ا کی غزلیں اور نظمیں آپ کے قادرالکلام اور ماہرِ فن شاعر ہونے کا بین اعلان کرتی ہیں۔اس مجموعہ میں آپ کا نوتراشیدہ ترکیبی اظہاریہ اور خود وضع کردہ ترکیبی اشاریہ ، اردو ادب میں مقیم اثرؔ ی مجتہدانہ رمزیت و علامت کا آفاقی مکاشفہ بن کر اُبھرتا ہے جو قاری و سامع کو مسرت و بصیرت سے روشناس کرتا ہے،ذیل میں لاتقنطوا سے نئی ترکیباتِ لفظی ملاحظہ کریں :
’’سلگتی ریت میں دریا بہادیا… شعورِ صنعتِ الفاظ… خلوصِ بزمِ تخیل… سارا بدن گونجتا نغمہ لگتا ہے… پتھر غنچہ لگتا ہے… ہنستی کھیلتی بارش دھوپ… یاد کی منڈیریں… نشترِ غم… قامتِ رعنا… جھلس گیا رنگ آفتابوں کا… غم شناس… صحبتِ گل… آگ برساتا ہوا ساون… تہذیبی چٹانیں… افکار کے شیشے… ساحلِ خفتہ… آستانِ غرض… پھول بنے انگارہ… غزل کے مفتیِ اعظم… سنگ میں تتلیاں… تن پہ سبزہ اُگا… اناے تشنہ لبی… سورج کا نگر،راحت اثر بن جائے گا… پیاس کو پھر کربلا کا معرکہ درکار ہے… ہماری پیاس نے توڑا سمندروں کا غرور… لفظوں کے چراغوں سے منڈیریں روشن… دشتِ خموشی… فصیلِ شب پہ لہو کے چراغ جلتے ہیں… بولتے لفظ… بجھا سکا نہ سمندر وہ پیاس ہوں … آبشارِ فکر… تشنگی ،جو کبھی ننگِ تشنگی نہ بنے… شہیدِ فنا … صورتِ گل… اس شوخ کا پیمانِ وفا… خون ارزاں ہے… پیٹ کی آگ… وقت سفاک ہے… جنم لیا ہے کسی آفتابِ رحمت نے… سفر کا تجربہ… غم کا دریا سرابوں کی بستی نہیں… بکھرتے ٹوٹتے موسم سے بچئے… اصلاحِ تمدن کافساد… ریشمی کفن… ردائے مکر… مطلعِ تہذیب… آئینۂ حقیقت… چاند زمینوں پہ اُگا کرتے تھے… شعلۂ عریاں… مسر ّتِ جاوداں، وغیرہ۔ ‘‘
مقیم اثرؔ کی مذکورہ بالا رنگا رنگ شعری لفظیات میں ان کی نوتراشیدہ مجتہدانہ ترکیباتِ لفظی کا نظارہ کیا جاسکتا ہے، پتھر غنچہ لگتا ہے،ردائے مکر،مطلعِ تہذیب،آبشارِ فکر،غزل کے مفتیِ اعظم وغیرہ ترکیبیں نئی حسیت کو اُجاگر کرنے والی وہ لفظیات ہیں جو آپ کی قادرالکلامی پر دال ہیں۔
مقیم اثرؔ کا تخلیقی بصیرت و بصارت اور فنی ریاضت و مجاہدہ جب لاتقنطوا سے آگے کا سفر کرتا ہے تو وہ پتھروں سے روحانی،عرفانی،اقداری سرمدی نغمات ِ جانفزا کو جنم دینے کی کاوشِ جمیل کرتا ہوا نظر آتا ہے۔جو نغمۂ سنگ کی صورت میں دنیائے ادب میں اپنے منفرد اور انوکھے اسلوب کا لوہا منواتا ہے۔ یہاں پہونچ کر مقیم اثرؔی نوتراشیدہ ترکیب سازی کا جوہر مزید نکھر جاتا ہے اور ہمیں ایک نئے جمالیاتی آہنگ سے ہمکنار کرتا ہے ،ذیل میں نغمۂ سنگ سے چند شہ پارے ملاحظہ کریں :
’’سورج نما اندھیرے… تمنا جھلسی ہوئی ملے گی… اشکوں کا سونا دریا…لفظ ی جھیلوں… بہتے ہوئے معنیٰ… جھلسے پیڑ… سلگتی شاخیں… ماتمی ترانوں… صبادستارِ گل باندھے کھڑی… شاخوں کے گھونگھٹ… کاسۂ سر… حسنِ سبزہ و گل… برقِ لفظ و بیاں… سرِ انا… گلِ شبنم… صحرائے شعلگی… قصرِ انا… بے حیا جسم گل لباسوں میں… غم کے پیوند… وصل سلطاں،فراقِ تاج محل… پانی جلتا ہے سنگ کٹتے ہیں… آئینہ بدن پتھر… چشمِ غضب… مقتولِ تمنا… صحبتِ رنگِ جامِ طلائی… حادثوں نے لبوں پر بچھا دی ہے آگ… فرازِ دار… جلوہ طراز… مزاجِ گل… پھول بھی ہوتے ہیں سخت دل… رقصِ قلندر،نازِ بتاں… جلتے چاند کی ٹھنڈک… آب پہ رقصاں شعلۂ جاں… سلگتی آشائیں… آفتابِ تبسم جو ہولبوں سے طلوع… مسلکِ شعر و سخن… تفسیرِ محبت … ذوقِ بازاری… جہازِ نطق… آئینۂ حیرت بنیں معنیٰ موتی… جل اٹھے ننگے شجر… تہذیبِ بدن روحِ شرافت سے ہٹی… ماتمِ شب نہ آرزوئے سحر… شاخ شاخ روئے گی پھول پھول تڑپے گا… طرزِ رقابت… شرحِ رفاقت… فسونِ چنگ و رباب… جنونِ طوق و سلاسل… بے حجابیِ گل… فسردگیِ غم نہ ماتمِ فردا … شعاعِ عزم رگِ آفتاب… جو طرفگی تری آرائش وجمال میں ہے… شاخِ احتمال… نشانِ پائے یقیں… قصرِ پُر جلال… پُر شکوہ خلوت… نُقرئی گذارشات… صندلیٖں جبیٖں… بستیاں جل گئیں گلابوں سے … خلوص کی چھاگل… مہذب وحشی… مَے زمزمہ آثار… چمپئی خواہشیں… سرمئی خواہشیں… شبنمی خواہشیں… ہنستے گلشن، وغیرہ۔‘‘
مقیم اثرؔ بیاولی کی یہ نت نئی اچھوتی،نرالی اور البیلی ترکیبات قاری کو کیف آگیں اور نشاط آگیں جذبات عطا کرتی ہیں ۔
لاتقنطوا سے نغمۂ سنگ اور اس کے آگے بدن نژاد قبا میں مقیم اثرؔ بیاولی نے شراب و شباب پسندروایتوں،ادارہ رسیدہ روایتی ترقی پسندی،فیشن زدہ روایتی جدیدیت پسندی،کوتاہ اندیش اشتراکیت پسندی کی برہنگی و عریانیت کو قبا پہنا کر انھیں ملبوسِ حنائی بخشنے کی کوشش کی ہے۔جس کا نظارہ بدن نژاد قبا میں کیا جا سکتا ہے۔اس مجموعۂ کلام میں کا شعری و شعوری ،علمی و ادبی اور جمالیاتی و جذباتی سفر مقیم اثری شعری و فنی عُلو میں رفتہ رفتہ اضافہ ہی کرتا چلا جاتا ہے، یہاں پہنچ کر آپ فکر و فن کے اوجِ ثریا تک رسائی حاصل کرلیتے ہیں اور مقیم اثری نوتراشیدہ ترکیبوں میں یہاں ہمیں ایک بالکل نیا،اچھوتا،البیلا،نرالا،منفرد،امتیازی اور رفعت نشان انداز نظر آتا ہے جو اس بات کی علامت بن جاتا ہے کہ خود وضع کردہ ترکیبی انداز اور نوتراشیدہ ترکیبی اسلوب صرف اور صرف مقیم اثرؔ بیاولی کا خاصّہ بن گیا ہے۔بدن نژاد قبا سے ترکیباتِ لفظی کی تازہ کاری و نادرہ کاری کے گلہاے رنگا رنگ ذیل میں ملاحظہ ہوں :
’’پیٖلی رُتوں میں سبز کنارا… دریا کی بھیگی پلکوں کا سپنا… جلتے سفر… رُ ویتِ سبزہ… آنکھ دریا… برف کے رستے… آنکھ کے پیالے… درد کا بازار… تعبیرِخوش آثار… بدن رُتوں میں مہکتا ہواخطاب… امڈتی شب میں تقسیمِ ماہتاب… بے رنگ حسنِ زائی… بجھ گیا شیشہ مگر جلتا ہے پتھر کا چراغ… قیدِ طاق… شعلۂ جاں… الفاظ بھی نکیلے ہوئے… موسمِ زر کے سُرخ صحیفے… نغموںکے ملبوس پہنتے ہیں الفاظ… جذبوں کا انجماد… دستار باندھے راستے… گرد کے ملبوس… جہلِ خط وخال… جلوۂ شورشِ باطن… کاسۂ ہر طلب،گنجِ گوہر طلب… شبنم کے دریچے… درد کو چمکاتا ہوں… شورشِ گل… سلگتے ہونٹوں نے لالہ زارآہوں کو بے چراغ کر ڈالا… غم نژاد… ترجمانِ آب و گل… شعلۂ مہ کامل… جانِ مہرِ تاباں… سنک اپنے لہو کی… اجتماعِ جلوۂ فردا… ذروں کا بدن… انبساطِ نور… بجلیوں کا بانکپن… شورشِ ناز و ادا… گھنے اجالے… کلفتِ جاوداں… غنچوں کے قفس… شہرِ خورشید… ہنستے شیشے… ذات کی اندھی گپھا… موجۂ ریگ … سلگتے کرب… سمٹتے کوزے… وحشت بڑھی گلابوں سے… نکہتِ ایماں… شوریدہ پل… اس کے لب سورج ہیں اس کی گفتگو پھولوں سی ہے… بجھتی خاموشی،پتھروں کو شعلہ پیکر نغمگی دے جائیگی… برگِ نوا شاداب تو ہو… احساس کی سنّت… انسان کی اُجڑی شکلوں … پتی پتی دھول بچھی… شبنم شبنم آگ لگی… گلشن پہ دھوئیں کا قبضہ… خوشبو کا دریچہ… پیمانۂ خوشبو… پیکرِ دار کی گل پیرہنی… میں فلک پیما نیا شعلہ صراطِ غم کا… بجھتی کتابوں کے شراروں… دشتِ ویراں کو مری آبلہ پائی نکہت… شعلۂ خاک… تکمیلِ انا… پھول کی چھاوں جلاتی ہے… تتلیوں کے مکان… دریا لباس تھا اس کا … ریگِ دشتِ محبت… نظر جھلسنے لگی ہے غرورِ شعلہ سے… رات کی جھیل… کنول خوابوں کے… اڑتی تہذیب… شجر کی تہی دستی… شب کی گھنی تنگی… حصارِ سنگ میں شعلوں کی پرورش… چمکیلے عقائد… ریت میں جذب دریا کی روانی… الفاظ کی چھاگل… شفق زارِ تمنا… سلگتی شام… ہوس گزیدہ جامِ طہور … نقطہ نقطہ ضوفگن بہتی لکیروں کاجمال… نگاہوں کی تمازت… انکشافِ جستجوئے ذات… صحرائی مزاج… شعلۂ نمو… رگِ گل سے گرمیِ خار تک… دھنک حصار… سینۂ ریگ… جگنو کی شال… کاسۂ گل… برف کھانے لگی ہے بازو کو… آئینۂ تبسم… خون کی غواصیوں کا تبصرہ … بھیگتی پلکوں کا شعلہ… لکھنی تھی مجھ کو شہر کی تفسیرِ جاںگداز… ویرانیوں کی بھیڑ… ہنر کی تمازتیں… جاںسوزیِ خلوص… نہ سورج میں نمی ہوگی نہ گرمی چاند میں ہوگی… فسونِ جبر… طوافِ حرف… دمکتے موسم… ہمارے نغموں سے نور اترے گا پتھروں میں… لفظوں کے آئینے… چاند کے زخم… لب کے شعلے… مچلتے درد… مہکتی ردا… شبنمیں پوشاک… پلکوں کی منڈیروں… بادل کے سلگ اٹھنے کا منظر… شبنم ترے شعلوں کی ردا… شمعِ نظر… برف زار پل صراطِ تیٖشۂ نظر نہیں… بادل نژاد شبنمیں دمساز… سنّائے ترجمانِ شعورِ حیات… زندانِ شہر… پیکرِ آواز… بارش گھروں میں آگ لگا کر گزر گئی… فسادِ ذہن… نُدرتِ ہوش… چنگاریوں کا سرد موسم… سمندروں کو نگلتا حباب… سسک رہی ہے رگِ ماہتاب… طوافِ چہرہ غرض بوجتی عبادت میں… آنسووں کی سیج… تیغِ حُسن… برف کا کفن… تہذیبِ تخت… تبسم کے اجالے… خوشبووںکا جال… وہ خوش قبا بدن کی گپھا میں کیا رہتا… ضعیف کمروں… یاد کی بارش… زمینِ درد پہ سجدوں کی بارش… شبوں کے تن میں اجالا ہمارے خوں سے ہے… اشکوں کی تحریریں … پتھریلے سینے… گدازِ قلب کی رعنائی… آنکھوں کی سلگتی ہوئی محرابوں… حرفوں کی ٹہنیوں… دہکتے خوں… برفاب منزلیں… بدن کے پیڑ… خون کے دشت… آنکھ کے جزدان… ملکوتی فضا… پُر نور وسیلے… امانتِ غم… مشعلِ درد… نکہتِ سیم بر… ہن�ستا موسم… جلتی فصل… ظالم کالی شریعت پہ اِترائے گا… آفتابی قبائیں… بیٖنا زخم… مہکتی فصلیں… ہمکتے ہوئے دالان… قصرِ ناقوس… ہلالی جذبے… نکہتِ کوے ہوس، وغیرہ ۔‘‘
متذکرہ بالا جواہرِ عالیہ مقیم اثرؔ کی اردو ادب میں ترکیب سازی کے باب میں مجتہدانہ حیثیت کا اظہار کرتی ہیں۔بدن نژاد قبا میں موجود یہ البیلی اور اچھوتی لفظی ترکیبوں کی جھلملاہٹ قاری کو نشاطیہ آہنگ سے ہمکنار کرتی ہے۔ان میں بیشتر ترکیبیں دیگر شاعروں کے یہاں نظر نہیں آتیں جو دراصل مقیم اثری نو تراشیدہ ترکیبیں ہیں جنھیں ایجادِ مقیم کہنا مبالغہ نہ ہو گا۔
علاوہ ازیں جب مقیم اثرؔ ی مجتہدانہ و عالمانہ طرزِ اظہار کا آفتابِ عالم تاب ’’سرحدِ لفظ نہیں‘‘میںطلوع ہوتا ہے تو اس کا انداز ہی نرالا ہوجاتا ہے۔مقیم اثرؔ نے یہاںوحدانیت، رسالت، روحانیت، عرفانیت، اثباتیت، انسانیت، اخلاقیت، صالحیت، بصیرت، بصارت اور فعالیت کا جمالیاتی و جذباتی حسن و جمال اور خد وخال اجاگر کرتے ہوئے یہ بتایا ہے کہ لفظ و معنیٰ اور صوت و صدا کی کوئی سرحد نہیں ہوتی ۔مقیم اثرؔ کے نوتراشیدہ ترکیبی مکاشفہ کی درخشندگی و تابندگی اس موڑ پر پہنچ کر مزید روشن و منور ہوجاتی ہے۔یہاں نوتراشیدہ لفظیات کی ترکیبات کی پختگی ، طرفگی،رنگارنگی،نادرہ کاری اور تازہ کاری کے گلہائے رنگا رنگ اپنے مکمل حُسن و دلکشی کے ساتھ جلوہ گر ہیں۔اس میں پیش کیا گیا نوتراشیدہ ترکیبی اظہاریہ اور خود وضع کردہ ترکیبی اشاریہ مقیم اثرؔ کو اردو کے دیگر ہم عصر شاعروں پر ممیز کردیتا ہے ۔لیکن یہ بھی سچ ہے کہ نغمۂ سنگ اور بدن نژاد قبا کی بہ نسبت اس مجموعۂ کا پیرایۂ زبان و بیان قدرے سہل اور آسان ہے اس لیے یہاں نوتراشیدہ ترکیبوں کے جوہر میں بھی یہ رنگ صاف جھلکتا ہوا محسوس ہوتا ہے ۔سرحدِ لفظ نہیں سے شعری لفظیات کا نوتراشیدہ ترکیبی اشاریہ ذیل میں ملاحظہ کیجیے :
ذوقِ شناوری… عریانیِ بیان… بندشوں کی تمازت… تخلیقیت کا نور… گھنی سرخیاں… سایہ بانٹتے کرب… منظرِ حیرت فزا… چاندنی سے دھوپ لیجے،دھوپ سے پھولوں کا نم… ہنستے سایے، ڈولتے جنگل… حرَف خزانہ… پیاسی شام… آنکھ کے در… بادل میری آگ میں جلتا… مہتاب شکن شامِ جدائی تیری… نُقرئی صبح… زرپوش مہکتی شب… پھول کھلاتے جھاگ… سیپ میں درخشا ںہے اب بھی تشنگی میری… تخیل آسمانی،فکر اپنی آبدوزی ہے… زکوٰۃِ حُسن… نادار لفظوں… جھلستی خو روی… دریا بار قلم… چاندورق… گلِ رعنا طوافِ یار کو چلیں… نقشِ پُرخلوص… دمکتے شیٖشوں… جوہری دَور کو نشّہ ہے فلک یابی کا… کھلتے چاند… لفظوں کے لشکر… ساوَنی لہجہ… اُتھلی سوچیں،اُتھلی آنکھیں… مہر پوش جلووں… چاند کے دھندلکوں… جل بجھے گی بیکسی… کب نئی بارش سلگتے خواب کو مہکائی گی… چلتے چلتے آگ بودوں مچھلیوں کے پیٹ میں… ماہتابی سلوٹوں… شعاعِ درد… جھلملاتی پیاس… چشمِ صد سحر… وحشت نثار نسبت… طوافِ رنگ و بُو… گدازِ عرش… دہکتی فکر… لبِ ایجاد… لفظ کی میت… جہاں افروز… سنگِ خود بیٖں… شعاعِ عقل… دھوپ کے کاغذ… چراغوں کے مجاور… ریگِ حق… جگمگاتی شاخ… فاصلہ آلود رستے… پلکوں کے سورج… بھٹکتے عصر… شعلۂ برگِ خود نما… گُل بنے ہیں سراب دستے بھی… پتھروںمیں گداز آئے گا… انا پرور… ہمکتے خواب… لہو کی بے حجابی… غم کی معجزہ کاری… تیٖشۂ روشن… زندہ ماتم… جلتے بجھتے اشک… آبی قفس… بھٹکتی پیاس… یاس کے جھومر… قالیٖنِ غم… آگ بن جائے گی شبنم،پاس کش ،ہونٹوں کے بیٖچ… کربلا میٖنارِ روشن… یہ چراغِ کربلا ہے دل کے منبر پر جلے… اے وفا افروز باغِ مصطفیٰ کے عندلیٖب… نظر کی چاپ سے آنکھوں کے شیٖشے ٹوٹ جاتے ہیں… گھنی طغیانیوں… بھٹکتے ہوئے رستوں… عکاسِ غمِ باطن… نقاشِ رمِ ظاہر… آفتاب جھروکے… ماہتاب چھتیں… کوہ شگافی… سلگتی ہوئی تنہائی… آنسووں میں درد کے وہ چاند بو کر جاوں گا… شوکتِ انا… گلزارِ بیکسی… چارہ گرانِ درد و فغاں… تاجورانِ علم و بیاں… اندھیرے لپیٹے بدن… سفر آشنا… دریا مزاجی… فرعون دھارے… بادل کی جلتی لٹوں… میں شبنم کا قاصد ہوں،گلوں کی صدا ہوں… بادل چھنی،سبز ہلکی ہوا… محوِ نظّارۂ خورشید حنائی دستے… دہکے ہوئے اشک سے پھوٹی خوشبو… رودِ غم،سنّتِ تنگی کا نہیں ہے قائل… زرد یادوں… دمکتے لفظ… نُدرتِ خوں… سرِ دشتِ بدن… عقل کی مشعل… قلم کی آگ نوائی… میں شب نژاد بُخل تو دلدار روشنی… میراثِ درد بولتے لفظوں نے بانٹ لی… ہر چاند میری آنکھ میں اُجڑی ہوئی کتاب… حجابِ سنگ… سبز دالان… سرِ کوچۂ شب… مہکتی ہمدمی… شعلہ بار کشتی… خوں ترنگ… آئینہ بازی… خورشید ڈھالیں ہم لہو کی تابناکی سے… کاغذی پتوار لفظوں کی… زخموں کی شادابی… گل رنگ بے چینی… درد بنجارہ… درد کی آنکھ سے ٹپکا آنسو مہ پارہ… کاغذ پر تو دیپ جلائے لفظوں نے… لفظوں کے گلدان… صدی افروز لمحے… کرن خوشبو سے پھوٹے اور پت جھڑ سے بہاریں … جہاں انگیز دانائی… روحِ حرفِ رواں… مجھ کو سورج ملاقات کی پیاس ہے… لالۂ غم سے محروم ہے دشتِ دل… جسم کے چوپال اب بھی نے نیازِ شامِ غم… بھوک کے دربار سے کاسہ بکف لوٹے ہیں سب… قحطِ سخی… آیاتِ وفاق… نازشِ پرواز محرومِ جزا… پر شکستہ زینتِ قصرِ ہَوا… اہلیت گوشہ نشیٖں،نوحہ بلب سیٖنہ فگار… درد محرم،درد کی روشن صدا… ابھی تو لفظ کی تلچھٹ ہی پی ہے… بیعتِ خورشید… نادیدہ حجابوں… ہنستی آنکھوں کا اُجڑنا… ثواب زار کی وسعت… حیات راستہ… آنکھ نے کانٹے چنے ہیں… لَو افگن تسلی زرد عالم کے لیے… نیند کا پھاہا… سُبک سارانِ شیٖشہ… روتی آنکھوں کا طواف… تازہ البم… آنسووں کی بھیڑ… غربت زدہ گل… مفاد غرق صفو… لہو کے دشت میں خیمہ مرا تلاش کرو… بُخل کی دہلیز… پردہ دارانِ ہوس… زمیں افروز لَو… مسکراتی شبیں… گھنی بارشیں… ڈوبتی دھڑکن… برف نَوردی… ہمکتے آنسو،دہکتا لہجہ… چمن کے طوافچی… بول اُٹھی ہیں خموشیاں… آنسووں کی آگ… گلابوں کی روش پر رقص کرتا واہمہ… مہتاب گھروندے… جلتے ارماں پیاس بجھائیں… بہتی لکیریں… خاک افروز… دہکی رہِ گذر… جھلستے چاند سے ایجاد کر نئی کرنیں… گُہر وقار… دھواں اگلتے لہو رنگ… مٹی میں انجانے فلک ہیں… شعلوں کی ردا… تپی بینائیو… رنگین دھوکہ… دھوئیں کی موج سے ایجاد کر سورج بھری شمعیں… جھلسی ہوئی صبحیں… بدن زنداں… حبابی آرزو… مہتابی اُڑانوں… جلتی خوشبو… مرتعش غم… دھواں شماری… ریت پی جاتا ہے جسم کا خون… درد پھواروں… دہکے منظر کی افق ہریالی… سرنگوں چاند ،شعاعیں زخمی… بلوریں سمتیں… نیّرِ نظر… آتشیں قفس… ستارہ بار خواہش …آگ تناظر… لفظ گھروندے بول رہے ہیں… چمکتی رہِ گذاریں… ہمکتی غمگساری… عروجِ غیرتِ یکتا… زخمِ فرصتِ بیجا… تحرُکِ پردہ… مری پتھرائی آنکھوں سے بھی چشمے ہوگئے جاری … مسافت کوش حسرت… بارش کا شعلہ… ہُما افروز سایا… منشورِ زراعت… مومی عدالت… برف کے تودے کا طواف… مچھلیاں ریت میں بھی تیراؤ… برف میں آگ بھڑکاؤ… کوئی کانٹافلک کی آب بنے… عیش تلووں… اشکوں کی شفق… شبنمیں روشن قبا… آفتاب سازی… ہزاروں چاند مرے خون میں بھی رقصاں ہیں… دودگامی… آرزو رورہی ہے خوں پیہم… روشنیِ صراطِ غزل… دلدلی تیرگی… کجروئیِ بیاں… مجھے دہکتی ہوئی بارشوں نے سیٖنچاہے… ہے آگ کی آنکھوں سے ٹپکنے میں مزا اور… تاریخِ بدن… مصحفِ غم… جُزدانِ ہست و بُود مجھے آبدانِ خاک… چنگاریاں اُگلتی ہیں تہہ دار برف بھی… جلتی حسرت… تیکھے عکس… ہوا افروز میری آنکھ کا نم… ضعیفی شباب… نظمِ صباحصار… میں حرفِ باریاب بھی ٹھکرایا لفظ بھی… چابد بوتی حسرتوں… شبنم تراشی… مہکتے سوز… آنسو جگر تراش گلاب… کاسۂ غم… دل چوکھٹ… آفتابِ شب… دستاربندیِ غم… اُس کی فکریں تمام مرّیخی… آگ سے بھی مکاں سجاتے ہیں… اپنے خون میں پلکیں ڈبو نہیں پاتے… عبادت کوش جلووں… طلائی اشک سیمیں دامنوں میں ڈوب جاتے ہیں… جبینِ شب… غموں کی پھوار… جلا کر آنکھ محرابوں میں آنسو… سر کو پٹختی پیاس… میں روشنی کی آنکھ سے ٹپکا ہُوا لہو… اونگھتے ساحل… گل کی آنکھوں میں رنج پھیلا ہے… لفظ کے جھومر… چاند طوافی… اب طوق ہے گلے میں خوشبو کی لعنتوں کا… خسروِ غم… کہکشاں مزاجی… مہکتی دھڑکنوں… منثورِ محبت… قحطِ بینائی… حجرۂ شام… مردہ پانی… یاد کا انجماد دل کی موت… بیناکرن… حُسنِ معنیٰ کا تموّج… تتلیاں ہم سے جنوں سیکھیں گی… احرامِ سفر… انسان طوافی… لفظوں کے گل دان… چاند پیالہ ہاتھ میں لے کر،سورج بھکشا مانگ چکے ہم… نیند چشمے ابلنے لگے ہیں مرے… خاموشیاں بات کرنے لگیں… گل سپنے… پتھر کے لب… زلزلاتی تپتی خواہش… اس کو عبور کرنے میں دریا جھلس گئے… کاغذی گل کاریاں… بولتی پرچھائیاں… جاگتے فراق کا تاروں بھرا وصال… چاند کو روند رہا تھا کوئی،آنکھ سورج کی بھی بھیگی ہوگی… غم نصابوں… تن کے گلاب… گلریز عزائم… تن کی ریت شگافی… پھر مجھ کو سرد ریت میں سورج اُگانے ہیں… آہوں کے دلکش مقبرے… رینگتے ہیں جاگتی آنکھوں میں خواب… برفاب کاری… منتشر جسموں کے جمگھٹ… منتشر روحوں کے غول… کاغذی یلغار… نقرئی جھنکار… رقصِ خوں… دھندلے دھندلے خواب دریچے… کالے چاند کی اُجلی باتیں… ظلم طنابیں … وغیرہ…‘‘
مقیم اثرؔ کی ان نت نئی اور اچھوتی ترکیبوں کا جائزہ لیتے ہوئے اشعار کے بین السطور میں پنہاں محاکات و علامات اور تلازمات و پیکرات کا دلکش و دلنشین انداز ہماری جمالیاتی حس کو بھر پور تسکین بخشتا ہے۔یہ پیکری بیانیہ مذوقی، سمعی، بصری، شامی، حسّی، آتشیں ، تحرکی، لونی، ادراکی، جمالیاتی وغیرہ پر مشتمل ہے۔
اس بات کا اظہار کیا جاچکا ہے کہ مقیم اثرؔ بیاولی کی شاعری گوناگوں خصوصیات کی حامل ہے ۔ پیشِ نظر مقالہ میں آپ کی نوتراشیدہ ترکیب سازی پر بحث مقصود تھی وگر نہ آپ کے جملہ شعری و فنّی محاسن پر تبصراتی کاوش کئی ضخیم کتب پر پھیل سکتی ہے ۔مقیم اثرؔ کی شاعری میں ندرتِ ادا کے ساتھ عالمانہ و مجتہدانہ اسلوب میں نوتراشیدہ ترکیبوں کے نجوم درخشاں ہیں اور جدّتِ اظہار کے مہر و ماہ روشن ہیں ،جو ہمیں یہ کہنے پر مجبور کرتے ہیں کہ مقیم اثرؔ بیاولی اکیسویں صدی میں نوتراشیدہ ترکیبوں کا مجتہد شاعر ہے۔
ابتدا میں اس بات کا اظہار کیا گیا ہے کہ مقیم اثرؔ بیاولی شاعر ہونے کے ساتھ ساتھ ایک اچھے نثر نگار اورمایۂ ناز انشاء پرداز بھی ہیں ۔آپ دراصل اردودنیامیں ایک شاعر ہی کی حیثیت سے متعارف ہیں اور آپ کے شاعرانہ وصف میں نثری صلاحتیں پس پردہ چلی گئی ہیں جب کہ آپ کی نثری کاوشات بھی اپنا جواب آپ نہیں رکھتیں۔ خود مقیم اثر ؔ کہتے ہیں کہ ’’مجھے میری شاعری کی بجائے میری نثر پر ناز ہے ۔‘‘ مقیم اثرؔ کا یہ کہنا ہمیں اس بات پر انگیز کرتا ہے کہ ان کی نثری کاوشات کو پڑھا اور پرکھا جائے ۔ جب راقم نے آپ کے مختلف مضامین کو پڑھاتو یہ واقعتا ایسا محسوس ہوا کہ آپ کی نثر بھی خاصے کی چیز ہے۔
مقیم اثرؔ کی نثری نگارشات میں کتب و رسائل پر تبصرے ،تنقید، پیش لفظ اورانشائیے نیزمختلف شخصیات پر مضامین موجود ہیں۔بعض غیر مطبوعہ تنقیدی مضامین راقم کو پڑھنے کا اتفاق ہوا جن میں مقیم اثرؔ ایک بے لاگ نقاد کے رُوپ میں نظر آتے ہیں ۔آپ کی نثری کاوشات کو دیکھ کر مجھے یہ کہنے میں باک نہیں کہ آپ جہاں ایک بلند پایہ شاعر ہیں وہیں مایۂ ناز انشاء پرداز و نثر نگار ہونے کے ساتھ ساتھ بہترین ناقد بھی ہیں۔آپ کا طرزِ تحریر اور اسلوب نگارش بھی اچھوتا اور نرالا ہے ،کم سے کم لفظوں میں بڑی سے بڑی بات کہنے میں آپ کومہارت حاصل ہے ،سمندر کو کوزے میں بند کرنے میں آپ یدِ طولیٰ رکھتے ہیں۔آپ کی نثر میں بھی نوتراشیدہ ترکیبی وصف کے جلوے نظر آتے ہیں۔یہاں آپ کے چند نثری شہ پارے پیش کیے جارہے ہیں۔
اعلیٰ حضرت اما م احمد رضا بریلوی کی شاعری پر مقیم اثرؔ کے تحریر کردہ غیر مطبوعہ مقالہ بعنوان’’رہبرِ قطرہ بہ دریا ہے خوشا موجِ شراب‘ ‘ کا اک اقتباس ملاحظہ کریں :
(۱) ’’اعلیٰ حضرت فاضلِ بریلوی خان احمد رضا کی روحانی شخصیت ژرف نگاہی در احوال و معارف ِ شریعت و قرابت و محبتِ رسول(ﷺ)کی تہہ دار نسبتوں اور عشقِ والہانہ اور ان کی دروں بینی کو اُجاگر کرنے کے لیے اجمالاً میں نے عرض کردیا ہے کہ آپ نے بواسطۂ کملیِ سیاہ و آستانۂ رسول(ﷺ) و صحابۂ کرام اجمعین و تابعین و تبع تابعین ،غوث ، قطب،ابدال کے فیضانِ روحانی سے جو فیض حاصل کیا ہے مقدور بھر اسکی گرہ کُشائی میں آسانی ہو۔
اعلیٰ حضرت فاضلِ بریلوی کو کلامِ حق کی ترجمانی کے لیے جو آہنگِ خاص رب تعالیٰ نے عطا کیا ہے وہ اتنا پُرکشش اور والہانہ اور وجد آفریں ہے کہ چرند ، پرند ، درند، انس وجن وملائکہ سبھی اس میں گنگناتے ہیں۔صبح تڑکے بعدنمازِ فجر اذان ونماز کی پُرتجلی فضامیں نعتِ احمدِ مجتبیٰ (ﷺ) کی مہکتی گونج جو مشامِ جاں کو معطر کرجاتی ہے،آپ کی مقبولیت کی دلیل ہے۔
محبانِ اراکینِ بزمِ رضا (سرشارانِ جامِ وحدت و محبتِ رسول ﷺ)کی عقیدتوں اور محبتوں سے بندھا ادب کا یہ حقیر طالب علم لرز گیا جب ان حضرات نے اعلیٰ حضرت ذی وقار فاضلِ بریلوی خان احمد رضا کی مشہورِ عالم نعتیہ و منقبتی تصنیف بعنوان’’حدائقِ بخشش‘‘کے کچھ مخصوص حصوں پر خیال آرائی کی دعوت یہ کہہ کر دی کہ ازروئے عاشقِ رسول(ﷺ)اس کتاب پر کچھ لکھانے کا ہمارا بھی حق بنتا ہے ۔التجا و اخلاص میں ڈوبی ہوئی اس محبت کا دبیز و مہین تاثُّر اس قدر ہیجان انگیز تھا کہ انکار اور گریز کا دامن مرے ہاتھ سے جاتا رہا اور میں نے اپنی بساط بھر خامہ فرسائی جو مکڑی کے نرم و نازک جال سے بھی نازک تر ہے کرلیا۔ ؎
ہم ہیں سوکھے ہوئے تالاب پہ بیٹھے ہوئے ہنس
جو تعلق کو نبھاتے ہوئے مرجاتے ہیں‘‘
اس اقتباس کی یہ عبارتیں ’’ژرف نگاہی در احوال و معارف ِ شریعت و قرابت و محبتِ رسول(ﷺ)کی تہہ دار نسبتوں‘‘…’’صبح تڑکے بعدنمازِ فجر اذان ونماز کی پُرتجلی فضامیں نعتِ احمدِ مجتبیٰ (ﷺ) کی مہکتی گونج جو مشامِ جاں کو معطر کرجاتی ہے‘‘…’’التجا و اخلاص میں ڈوبی ہوئی اس محبت کا دبیز و مہین تاثُّر اس قدر ہیجان انگیز تھا کہ انکار اور گریز کا دامن مرے ہاتھ سے جاتا رہا اور میں نے اپنی بساط بھر خامہ فرسائی جو مکڑی کے نرم و نازک جال سے بھی نازک تر ہے کرلیا‘‘ پڑھیے اور بار بار پڑھیے یہ چند جملے کئی صفحات پر پھیلنے والے مضامین کو اس حُسن و خوبی اور اختصار سے بیان کرتے ہیں کہ بے ساختہ دل سے داد نکلتی ہے ۔جومقیم اثرؔ جیسے منفرد شاعر کی منفرد نثر نگاری کی روشن دلیل ہے۔
اسی طرح عبدالرشید ادیبؔ بھڑگانوی کے سفرنامے’’کاساً دہاقاً ‘‘پر مرقومہ مقیم اثرؔ بیاولی کا پیش لفظ ہمارے اس دعوے کی تصدیق کرتا ہے کہ مقیم اثرؔ اپنی نثر میں سمندر کو کوزے میں بند کرنے کا ہنر بخوبی جانتے ہیں اور وہ مختصر مختصر جملوں میں بڑی سادگی و صفائی سے بڑے سے بڑا مفہوم ادا کردیتے ہیں اور یہاں آپ کا نوتراشیدہ ترکیبی انداز بھی اپنی مکمل آب و تاب کے ساتھ جلوہ گر نظر آتا ہے جو قاری کو مسرت و بصیرت کے احساس سے آشنا کرتا ہے۔’’کاساً دہاقاً ‘‘ کے پیش لفظ کا اقتباس ملاحظہ کیجیے :
(۲) اے اہلِ نظر کیوںکہ میرے پیشِ نظر فولادی آئینہ نہیں قلبی آئینہ ہے،اور سب جانتے ہیں کہ اس صیقل نگۂ یار کی توجہ کے بغیر ممکن نہیں یہاں آگ کو وصلیہ صیقل بنانا بے سود ہوگا،اس لیے اپنی بے نوری،اپنی کم مائیگی کو رفو کرنے کے لیے، منوّر کرنے کے لیے کیوں نہ اسی بارگاہِ بصیرت نواز میں خود کو بطورِ عجز پیش کردوںجہاں ذرہ بھی آفتابی خلعتوں کا اعزاز پاکر شانِ خداوندی کی خاک نوازجہت کی روشن مثال بن جاتا ہے۔شاید یہ عاجزی اس درِ کرم سے سعادت کا اعزاز ہی حاصل کرلے، کہاں میں اور قلبی آئینے کا انعکاس، جس کی ہر کرن میں ایک کائناتِ معانی جلوہ گر ہے، جس کی دل فروز ضیا قبااور ادا ہر سمتِ نظر کو خیرہ کیے ہوئے ہے۔ جس کا جمالِ جہاں افروز عرش و فرش کی سفر وقیام کی داخلی و بیرونی وارداتوں کو موسموں کی جملہ حیرت زائیاں عطا کرکے مجھے بھی حیرت آئینہ سے ہمکنار کررہا ہے ْفکر مند ہوں کہ ’’کاساً دہاقا‘‘پر میری رائے کے اظہار کا کیا بنے گا؟واللہ ! دروبست الفاظ و معانی سے کھیلتی روح و بدن کی صد رنگ حیرت فزا رعنائیاں اور تابناکیاں اور ان کا نقرئی مترنم چشموں کا سا نور افشاں دلکش بہاوتسکینِ دل وجاں کا سامان بہم کرگیا،ایسا محسوس ہونے لگا ہے جیسے میں بھی اس سفر نامے کا ایک مجلا و مصفّیٰ ناقابلِ فراموش کردار بن گیا ہوں ۔‘‘
(کاساً دہاقا پر پیش لفظ ،مرقومہ مقیم اثرؔ بیاولی،بتاریخ ۲۵؍مارچ۲۰۰۱ء)
متذکرہ بالا نثری شہ پارہ اپنے اندر متنوع انداز لیے ہوئے ہے ۔پیرایۂ زبان و بیان میںتصوفانہ آہنگ بھی ہے،سائنٹفک طرز بھی،……یہ نو تراشیدہ ترکیبیں اپنے اندر ایک جہانِ معانی سموئے ہوئے ہیں ’’بصیرت نواز …خاک نوازجہت …آفتابی خلعتوں…موسموں کی جملہ حیرت زائیاں … حیرت آئینہ‘‘…اور یہ جملہ …’’دروبست الفاظ و معانی سے کھیلتی روح و بدن کی صد رنگ حیرت فزا رعنائیاں اور تاب ناکیاں اور ان کا نقرئی مترنم چشموں کا سا نور افشاں دلکش بہاوتسکینِ دل وجاں کا سامان بہم کرگیا‘‘…تو وجدانی کیفیت سے دوچار کرتا ہے ۔مقیم اثرؔ کے نثری شہ پاروں میںاجمال کے ساتھ ایسی تفصیل پوشیدہ ہے جسے اہلِ نظر بہ خوبی محسوس کرسکتے ہیں ۔ذیل میں مقیم اثرؔ کے چند نثری اقتباسات بلاتبصرہ ملاحظہ کریں اورآپ کی اعلیٰ ترین ادبی صلاحیتوں ،فصاحت و بلاغت کا نظارا کریں۔
(۳) ’’ادبی ادوار کی تقسیم و تہذیب و ترتیب کے ارتقائی جاری دور کا پوری معنوی،تہہ دار،غیب رس،صدرنگ ادبی منظر نامہ میری آنکھ میں بہ تمام وکمال اپنے پورے طمطراق کے ساتھ محوِ گردش ہے سوچ رہا ہوں ، روایتی ادب، ترقی پسند ادب، جدیدادب، مابعدجدیدادب، ساختیات، پسِ ساختیات، اور نئے عہد کی شعری تخلیقیت سے مزین شاہ راہِ حیات سے گذر کر قبرِ نشاطؔ کاطواف کچھ اس انوکھے انداز سے کروں کہ رحمت و عقیدت و فضیلت بہم ہوکر ’’امر بیل‘‘ کی ترجمانی میں تجلی ریز، شفق آلود افق بن کر نگاہ و دل کا مرکز بن جائیں۔‘‘ (اقتباس از:نشاطؔ…ایک شیریں زخم آلود دیوانگی،مرقومہ :مقیم اثرؔ بیاولی)
(۴) ’’ پڑھیے کہ یہی مقصودِ رب تعالیٰ بھی ہے،سوز و آہنگِ قلبی میں ڈھلے اُس سفرِ حرفِ نوری پر لکھی گئیں چند تاثراتی شعاعیں جن سے حیات کی صد رنگ بوقلمونی مترشح ہے۔ زندگی ایک منصوبہ بند، رازدار، طرح دار، پیچ دار حکمت ہے، جس کی گرہیں ، تدبر، فکر، عقل، بصیرت، بصارت، شیریں دیوانگی ، مہکتی فرزانگی، صبر واستقلال مسلسل جدوجہد کے ذریعے کھولی جاسکتی ہیں۔ یہ حکیمانہ ، فلسفیانہ، شاعرانہ، درد افروزتازیانہ، ہمارے حکمتِ پرور ذہن کشاہاتھوں کو ان نظموں کے وسیلے سے دستیاب ہوتا ہے………عہدِ موجود اور عقل کی نئی اڑانیں جو تاروں کی ہم نشینی کی آرزو مند ہیں، نئے قدم جو زمیں فرسائی سے آزاد ہوکر فلک پیما ہوچکے ہیں ۔ ایسے نورانی دورِ تغیر و ارتقا پذیر میں بڑی عمر کے تشنگانِ علم کی تربیت کی جانب اپنا رُخ کرنا صبح کے تختِ زریں سے اتر کر زوالِ شام کو نئے آفتابِ علم و ہنر کی روشنی سے ہمکنار کرنا نہیں تو اور کیا ہے؟………میں ان نظموں کے عمیق مطالعے کے بعد پورے وثوق سے یہ بات لکھ رہاہوں کہ ان نظموں کے وسیلے سے ہم اکیسویں صدی کو درکار اُس بصیرت آگیں، خیرپرور، روشنی کشا، دردآمیز، خیرکش، تمدّن نثار، عدل بیز، آبادی پسند، پُر امن داعی وسائیں کی تخلیق کرسکتے ہیں۔ جس پر مہذب و متمدن نور افشاں معاشرت و معیشت آفاقی سطح پر ہمیشہ ہمیشہ ناز کرتی رہے گی۔‘‘
(اقتباس از :مرحبا اے ضیاپاش نجمِ حیات آفریں ،مرقومہ :مقیم اثرؔ بیاولی ،مشمولہ: کامیابی کے موتی ،رمضان فیمس،)
(۵) ’’یہ غزلیہ تفکر نامہ برادرم’’راحت اندوری‘‘ کی اس فکری جگر کاوی کے نام جو حقائق کش، تیرہ و سنگلاخ، زمینوں پر’’دل و دماغ سے پھوٹتی لوؤں کے سہارے کشتِ حرف و نوا‘‘ کی نمو کاری کو مقصودِ حیات بنا کر درد کی روشن تفسیریں لکھنے میں ہمہ وقت سورج بنے اپنی ہی ذات میں سلگ رہے ہیں، مہک رہے ہیں۔ اور دنیا گلاب رنگ آنکھوں سے اُن کے فن کے نظارے میں ڈوبی ہوئی ہے۔‘‘
(راحت اندوری کے لیے:از:مقیم اثرؔ بیاولی،بتاریخ ۲۹؍ دسمبر۲۰۰۷ء)
(۶) ’’یہ غزل میرؔ و غالبؔ کی عظمتِ فن کے وسیلے سے اُس حساس قد آور فنکاراحمد فراز کی نذر کررہاہوں جنہوں نے غزل کی روایت کواپنے خون کی شرکت سے ایک نئی جہت، اک نیاوقار، اک نیا آہنگ، اپنے عصر کی زندہ دھڑکنوں کی شمولیت کے ساتھ عطا کرکے آنے والوں کے لیے اُسے لالۂ صحرا کا بہشتی زیور پہنا دیا ہے۔ ‘‘(احمدفراز کی نذر،مشمولہ :سرحدِ لفظ نہیں:مقیم اثرؔ، ص۲۹۹)
(۷) ’’ہرے بھرے دن، سہاگنوں سے جگمگاتی راتیں، شام کی اداسی میں گرم و تازہ لہو کی سرخیاںبھرنے کی آرزوئیں افقِ حیات پر جگمگاتے خواب، موسموں کا سیلانی مزاج، آبی برقی توانائیاں، محبتوں اوردشمنی سے بھری جلتی مہکتی زرد سرخ بستیاں، لہولہان ساعتیں، حالات کی تمازت کی نذر ہوکر کافور سی پگھل چکی ہیں۔
دوپہر کے جلتے سینے سے سبز گھاس کی نمود، ویران تپتی رہِ گذاروں پر لوٹتے زہریلے سا نپوںکے منہ سے آبِ حیات کی توقع رکھنے کے مترادف ہے ۔ درد و ٹیس سے بھری پیاس، اپنے زخموں کی تلافی اور سیرابی کس چشمۂ حیات سے طلب کرے ، اس ایک سلگتے سوال نے ابھرتی مچلتی آرزووں کو بیوَگی کا لباس پہنا دیا ہے۔
وقت ڈھونڈ رہا ہے پھر کسی عیسیٰ نفس، کسی موسوی عصااور اس انگشتِ قمر شکن کو جن کے روشن وجود کے سامنے ہمیشہ سر چڑھتی راتوں نے سجدے کیے ہیں۔
اُڑتی ہوئی دھول کو نئے آئینوں میں ڈھال کر ان سے نئی پرچھائیاں ایجاد کرکے’’مکانِ جامد‘‘ کو لازمانی، لامکانی تحرک سے آشنا کرانا ہی فقط ادب و فن کی ذمہ داری نہیں بلکہ اس عجائب کدے کے تمام مبہم عجائبات کو کما حقہٗ نئے طور، نئی طرزپر ’’مٹی ‘‘ میں گھول کر اک نئے جہانِ حسن کی تخلیق کا اعزاز عطا کرنا بھی اہلِ علم و ادب کا فریضہ و منصب بن جاتا ہے۔
نئے خواب، نئی دھوپ، نئے سایے، نئے نشیب، نئے فراز، نئے پیچ و خم، نئی راہیں ، نئی منزلیں، نیا اضطراب، نیا سکون، نئے قیاس وگمان، نئے واہمے، نیا یقین، نیا ایقان، نیا عرفان، نئے پرندے، نئی اُڑانیں، نئے خورشیدو قمر، مِن جملہ غیاب و شہود کی نئی زمینوں پر کھینچے گئے خطوط پر اپنے افکار و خیالات کے روشن نقوش ثبت کرنے والا عبقری شاعر ایک عرصے بعد زمانوں کی سمجھ میں آتا ہے۔
لفظِ روشن ، مہر آگیں ہر جہت سے آشنا
مجھ کو ڈھلتے چاند کے ماتم کدوں سے دور رکھ
(دیباچہ سرحدِ لفظ نہیں :مقیم اثرؔ بیاولی)
مقیم اثرؔ بیاولی کی نثری کاوشوں کے یہ سات اقتباسات آپ کے مایۂ ناز انشاء پرداز،بلند پایہ ادیب اور صاحبِ طرز نثر نگار ہونے پر دلالت کرتے ہیں۔اہلِ علم و ادب ان اقتباسات کوپڑھ کر مقیم اثرؔ کی نثر میں پوشیدہ نوتراشیدہ اور خود وضع کردہ ترکیبوں کا انوکھا ،اچھوتا اور البیلا نقش دیکھ سکتے ہیں ۔ان اقتباسات اور مضامین کو ملاحظہ کرنے کے بعد مقیم اثرؔ کا یہ کہنا کہ ’’مجھے میری شاعری کی بجائے میری نثر پر ناز ہے ۔‘‘ہمیں بھی یہ کہنے پر انگیز کرتا ہے کہ مقیم اثرؔ کی شاعری تو شاعری نثر بھی اپنی مثال آپ ہے۔
ذیل میں مقیم اثرؔ کے چند غیرمطبوعہ شعری مجموں کے نام درج کیے جاتے ہیں جو انوکھی اور نرالی لفظیات پر مبنی نوتراشیدہ ترکیبی اظہار ہیں اور اپنے اندر اک وسیع مفہوم سموئے ہوئے ہیں:
شکستِ آواز… زنجیرِصبا… سرودِ شام… طاوسِ رنگ… وحشتِ در… رقصِ شرار… جلوہ ٔ سراب… شعاعِ درد… نگارِ دشت… جرسِ گل… غزالِ شوق… شعورِ غم… زخمِ جنوں… رَمِ غزل… لمسِ ماورا… آسمانِ بے زمین(براے غالبؔ)… موجِ بے زنجیر… تیغِ خود نگر… خاک خاک موج… ورق ورق گلاب… شعلہ زار حرف… قطرۂ بحر کُشا… لوحِ صحرا… لہو بھی ایک معجزہ… غمِ آتش خیز… صداے شہرِ اجنبی… طوافِ نور… پیراہنِ خاک… تبسم اشک… برقِ نظر… رنگِ آبشار… لَودیتی خوشبوئیں… دھوپ پتھراتی چھاوں… چاک ہے پردۂ وجود… سلگتے خواب دروازے… تن تن عریانیاں… شہر جنگل نہ بنے… آگ پر جلتی پیاس… دھوئیں کے بل… بجلیاں بم نہیں پھول برسائیں… سر کے بل چلیں(مجموعۂ نعت)‘‘۔
اخیر میں مقیم اثر ؔبیاولی کی شاعرانہ جگر کاوی اوراعلیٰ ترین شعری، فنّی اورفکری بصیرت و بصارت پر خراجِ تحسین کیلئے چار مصرعے تحریر کرکے مقالے کا اختتام کرتا ہوں ۔
ٹھٹھرتے برف زاروں پر سلگتی بارشیں دیکھیں
ترے احساس نے اکثر مہکتی تابشیں دیکھیں
نرالے پیرہن بھی ہیں ترے حرف و معانی کے
یہیں آکر گلابوں سے گزرتی آتشیں دیکھیں
(بتاریخ : ۱۹؍ فروری ۲۰۱۰ء بمطابق ۴؍ ربیع الاول ۱۴۳۱ھ بروز جمعہ)
Comments
Print
29 Apr, 2016
Views: 2737
Dr. Muhammed Husain Mushahi Razvi
About the Author: Dr. Muhammed Husain Mushahi Razvi Read More Articles by Dr. Muhammed Husain Mushahi Razvi: 409 Articles with 596932 views

Dr.Muhammed Husain Mushahid Razvi

Date of Birth 01/06/1979
Diploma in Education M.A. UGC-NET + Ph.D. Topic of Ph.D
"Mufti e A.. View More
Add Your Article
Article Categories
Politics سیاست Society & Culture معاشرہ اور ثقافت Religion مذہب Other/Miscellaneous متفرق Literature & Humor ادب و مزاح Education تعلیم Health صحت Famous Personalities مشہور شخصیات Novel افسانہ Science & Technology سائنس / ٹیکنالوجی Sports کھیل True Stories سچی کہانیاں Books Intro تعارفِ کتب Travel & Tourism سیر و سیاحت Career کیریر Entertainment انٹرٹینمنٹ Kids Corner بچوں کی دنیا Poetry شعر و شاعری 100 Lafzon Ke Kahani سو لفظوں کی کہانی Arts ہنر Young Writers نوجوان قلم کار Gadgets گیجٹ Military Democracy سول فوجی جمہوریت Hamariweb Writers Club ہماری ویب رائٹرز کلب Step By Step
Recent Poetry Articles
میرے نیڑے کوئی نئیں آیا
محفلاں وچ وی کلیاں ورگے
اوہندی ذات کتھاں میڈی ذات کتھاں
میرے نیڑے کوئی نئیں آیا
View all Poetry Articles
Most Viewed (Last 30 Days | All Time)