محدود لفظی فن و مہارت( 20لفظوں کی 20کہانیاں1تا20)
(Prof Talib Ali Awan, Sialkot)
٭ صف
ایک ہی صف میں کھڑے ہوگئے محمود و ایاز
ایک جنازہ پڑا،پہلی صفیں محمودوں کی تھیں،باقی ایازوں کیں۔
٭ بچے
گلی میں غریب بچے کھیل رہے تھے ،میں نے ڈانٹا ۔
آگے گیا،امیر بچے کھیل رہے تھے ،میں محظوظ ہوا۔
٭ فرق
چودھری نے مسجد میں 5000 روپے دئیے ،مولوی نے ڈھیروں دعائیں دیں۔
میں نے 100دئیے ،اعلان ہی نہیں ہوا۔
٭ حلال
میں گوشت لینے قصائی کی دکان پر پہنچا ، پوچھا:’’ حلال ہے نا؟‘‘
قصائی نے پیسے پکڑے ،پوچھا: ’’ حلال ہیں نا؟‘‘
٭ عمر
بس میں عورتیں دو اور سیٹ ایک ،جھگڑا ،کنڈیکٹر :
’’ باجی ! جس کی عمر زیادہ ہے بیٹھ جائے ۔‘‘
دونوں کھڑی رہیں ۔
٭ حاجی اور آجی
حاجی: جو حج کرے ،اسے سنبھال کر رکھے ،نیک رہے۔
آجی: جو حج کر لے مگر بد اعمالیاں نہ چھوڑے۔
٭ مشترک
استاد : ہندو مذہب میں مردے اور پاکستان میں سرکاری ریکارڈ جلانے میں کیا
چیز مشترک ہے؟
پپو: حساب سے بچنا۔۔۔۔۔
٭ ٹیکس
جو ٹیکس نہیں دیتے انہیں ملک سے شکایت کا کوئی حق نہیں ۔
البتہ ملک پر حکومت کرنے کاحق ہے ۔
٭ ہومیو پیتھک
بعض لوگ ساری زندگی ہومیوپیتھک دوائی کی طرح گزار دیتے ہیں :
نہ کوئی فائدہ ،نہ نقصان ۔صدرِ پاکستان کی طرح ۔
٭ خوشامد
نصیحت وہ سچ ہے جسے ہم غور سے نہیں سنتے۔
خوشامد بدترین دھوکہ ،جسے ہم پوری توجہ سے سنتے ہیں ۔
٭ میک اپ
ایک دلہن شادی کے دن بڑی خوبصورت لگ رہی تھی ۔
صبح اٹھی ،منہ دھویا ،اب وہ خوفصورت لگ رہی تھی ۔
٭ شرم آئندہ
میرا دوست ایم فل میں فیل ہو گیا ۔میں نے پوچھا :’’ شرمندہ نہیں ہوئے ۔‘‘
دوست بولا:’’ نہیں ،شرم آئندہ ہوں۔ ‘‘
٭ عجیب لوگ
سیدھی بات کرو تو بدتمیز،بااخلاق ہوں تو سیاسی،
اختلاف کریں تو بے ادب اور لحاظ کریں تو منافق کہلائیں ۔
٭ سیلفی
دادی : علی بیٹا ذرا دیکھنا تو لڑکی کو فالج ہورہا ہے ۔
علی ـ: نہیں دادی وہ سیلفی لے رہی ہے ۔
٭ نوبل انعام
اگر آپ نوبل انعام یا دیگر بین الاقوامی ایوارڈ حاصل کرنا چاہتے ہیں
تو پاکستان یااسلام کے خلاف کچھ لکھیں ۔
٭ ضد
ساس نے اپنی بہو کی ناک رگڑوانے اور اسے سبق سکھانے کے چکر میں
اپنے ہی بیٹے کو مروا دیا ۔
٭ عقل کا صدقہ
مجھے جب عقل کا صدقہ و خیرات نکالنا ہوتو
کسی جاہل سے سیاسی ایشو پر بحث کر لیتا ہوں۔
٭ ریٹ
رمضان المبارک کے آغاز سے ہی بسم اﷲ کریانہ سٹور،
الحاج جنرل سٹور اور مدینہ بیکری پر ریٹ بڑھ جاتے ہیں ۔
٭ قدر
ایک شخص جرابیں پہنے ،جوتا سر پر ۔
وجہ پوچھنے پر اس نے بتایا:’’ جوتا میرا ہے ،جرابیں کسی کی ہیں ۔‘‘
٭ بیوی
جہاں بھی جاؤ بیوی کے قصے ہیں۔
کوئی لاکر رو رہا ہے ،کوئی لانے کے لئے رو رہا ہے ۔ |
|