دنیا کی انوکھی شادی٬ دلہن تھانے سے رخصت

اپنی شادی کے دن کو یادگار بنانا یقیناً ہر انسان کی خواہش ہوتی ہے اور اس کو خواہش کو پورا کرنے کے لیے لوگ مختلف طریقہ کار اختیار کرتے ہیں لیکن ایک بھارتی جوڑے کی شادی تو حادثاتی طور پر ایسی یادگار بنی جس کے چرچے مدتوں تک عام رہیں گے-
 

جی ہاں بھارتی کنوج کے ایک جوڑے کی شادی کی تقریب اچانک سے مقامی تھانے میں اس وقت منعقد ہوگئی جب دولہا اور دلہن کے گھر والوں کے درمیان کسی بات پر لڑائی شروع ہوگئی اور معاملہ ہاتھا پائی تک جا پہنچا-

بات اس حد تک بڑھی کہ دونوں گھرانے دولہا دلہن سمیت شکایت لے کر تھانے جا پہنچے جہاں پولیس والوں نے شکایت درج کرنے اور کاروائی کرنے کے بجائے ایک دلچسپ اقدام کیا-

تھانے کے انچارج نے دولہا دلہن کو سمجھایا کہ وہ اس معاملے کو ختم کریں اور اپنا گھر بسانے پر توجہ دیں٬ کہیں ایسا نہ ہو کہ گھر بسنے سے پہلے ہی اجڑ جائے- انچارج کی کوشش رنگ لائی اور جوڑے کو بات سمجھ آگئی جس کے بعد شادی کی باقی رسومات تھانے میں ہی ادا کی گئیں-
 

تھانے میں ہونے والی اس شادی میں وہاں موجود تمام پولیس اہلکاروں نے نہ صرف شرکت کی بلکہ ناچنے گانے کے علاوہ نئے جوڑے پر پھول بھی برسائے- جس کے بعد یہ نیا جوڑا خوشی خوشی گھر کو روانہ ہوگیا-