وزیراعظم پاکستان عمران خان کی زیر صدارت وفاقی کابینہ کا اجلاس ہوا جس میں لاک ڈاؤن 30 اپریل تک بڑھانے کی منظوری دے دی گئی ہے۔
تفصیلات کے مطابق وفاقی کابینہ کااجلاس ہوا جس میں 6 نکاتی ایجنڈے پرغور کیا گیا، اجلاس میں کورونا وائرس کی مجموعی صورتحال کا جائزہ لیا گیا جبکہ ملکی معاشی صورتحال پر بھی بریفنگ دی گئی۔
احساس کیش ٹرانسفر پروگرام سے متعلق ثانیہ نشتر نے بریفنگ دی جبکہ ای او بی آئی پنشن میں اضافے کی سمری مؤخر کردی گئی۔
کابینہ کے اجلاس میں لاک ڈاؤن میں توسیع کے حوالے سے 2 تجاویز پر غور کیا گیا، جن میں لاک ڈاؤن 21 اپریل تک یا 28 اپریل تک بڑھانے کا کہا گیا۔
تاہم لاک ڈاؤن 30 اپریل تک بڑھانے کی منظوری دے دی گئی ہے جبکہ حتمی منظوری قومی رابطہ کمیٹی کے ہونے والے اجلاس میں دی جائے گی۔