احتساب عدالت کے سابق جج ارشد ملک کا آج صبح ایک نجی اسپتال میں انتقال ہوا جہاں گذشتہ تین ہفتوں سے ان کا نمونیہ کا علاج چل رہا تھا۔
تفصیلات کے مطابق میڈیا رپورٹس میں بتایا جا رہا ہے کہ ارشد ملک کا انتقال کورونا کے باعث ہوا تاہم اور اب ان کے صاحبزادے کا وضاحتی بیان سامنے آیا ہے جس میں ان کا کہنا ہے کہ والد کی موت کورونا کی وجہ سے نہیں بلکہ دل کا دورہ پڑنے کی وجہ سے ہوئی ہے۔
ارشد ملک کے بیٹے نے بتایا کہ والد کا کورونا ٹیسٹ کروایا گیا تھا جس کی رپورٹ منفی آئی تھی۔
خیال رہے کہ ارشد ملک کے سوگواران میں دو بیٹے اور دو بیٹیاں ہیں۔ یاد رہے کہ احتساب عدالت کے جج ارشد ملک کی جانب سے 24 دسمبر 2018ء میں سابق وزیر اعظم نواز شریف کو العزیزیہ اسٹیل مل کیس کے مقدمے میں 7 سال قید کی سزا سنائی گئی تھی۔