ہم ایک تھپڑ کےجواب میں دس تھپڑ نہیں ماریں گے ۔۔۔ لاہور ہائی کورٹ میں شہباز گل کو انڈے کیوں مارے گئے ؟

تفصیلات کے مطابق وزیراعظم عمران خان کے معاونِ خصوصی برائے سیاسی روابط شہباز گل پر لاہور ہائی کورٹ کے احاطے میں دو انڈے اور سیاہی پھینکی گئی، شہباز گل کے ماتھے اور ہاتھ پر سیاہی لگی۔

شہباز گل نے کہا کہ انہوں نے اپنے کالے کرتوتوں کی سیاہی پھینکی ہے، یہ غنڈہ گردی ہے، ہم ایک تھپڑ کےجواب میں دس تھپڑ نہیں ماریں گے۔

انہوں نے کہا کہ ایک گالی کےجواب میں دس گالیاں بھی نہیں دیں گے۔ غنڈہ گردی کی تربیت نہیں دیں گے، سیاست کریں گے۔

شہباز گل نے کہا کہ اللہ کا شکر ہے میں بالکل ٹھیک ہوں۔

خیال رہے کہ عدالت میں پیش ہونے سے قبل شہباز گل نے اپنے ٹوئٹر پر جاری پیغام میں بتایا دیا تھا کہ وہ آج 2 بجے لاہور ہائی کورٹ میں معزز عدالت کے سامنے پیش ہوں گے۔

شہباز گل نے اپنے ٹوئٹ میں لکھا تھا کہ انہیں کچھ صحافی دوستوں سے پتہ چلا کہ مسلم لیگ ن کے غنڈا گروپ نے میرے پر حملہ کرنے کی تیاری کر رکھی ہے۔

انہوں نے لکھا تھا کہ عمران خان کا سپاہی ہوں، عدالت آؤں گا، ڈرنے والا نہیں۔ سیاست کرنے پر یقین رکھتے ہیں طرح غنڈا گردی پر نہیں۔

انڈے اور سیاحی پھینکنے والے نامعلوم افراد کون تھے اور مارنے کی کیا وجہ تھی یہ معلوم نہیں ہوسکا تاہم شہباز گل کو یقین ہے کہ حملہ آوروں کا تعلق ن لیگ کی جماعت سے ہے۔