پاکستان سمیت دنیا بھر میں کورونا ویکسینیشن کا عمل جاری ہے اور مسلمانوں کی عبادتوں کا خاص مہینہ رمضان المبارک بھی قریب ہے۔
ایسے میں سب ہی کے ذہن میں یہ بات گردش کر رہی ہے کہ کیا روزے کی حالت میں کورونا ویکسین لگائی جا سکتی ہے؟
غیر ملکی میڈیا کے مطابق اس حوالے سے سعودی عرب کے مفتی اعظم اور علماء کمیٹی کے سربراہ عبدالعزیز بن عبداللہ آل شیخ نے بیان جاری کر دیا ہے جس میں کہا گیا ہے کہ کورونا ویکسین لگوانے سے روزہ نہیں ٹوٹتا۔
مفتی اعظم نے واضح کرتے ہوئے کہا کہ ویکسین پٹھے میں لگائی جاتی ہے جس سے روزہ نہیں ٹوٹتا اور نہ ہی ویکسین کھانے پینے کی کوئی شے ہے تاہم اس میں کوئی فکر کی بات نہیں۔
واضح رہے کہ اسلامک افیئرز اینڈ چیریٹیبل ایکٹویٹیز ڈیپارٹمنٹ دبئی کے مفتی اعظم ڈاکٹر محمد عیادہ الکبیسی نے بھی اس ہی بات پر اتفاق کرتے ہوئے کہا ہے کہ علماء کا اس بات پر اتفاق ہے کہ رگوں یا گوشت میں لگائے جانے والے انجیکشن سے روزہ نہیں ٹوٹتا۔