عام طور پر ریسکیو ورکرز کی معاشرے میں مدد کرتے وقت کی ویڈیوز ہم سوشل میڈیا پر ہی دیکھتے ہیں اور عموما پاکستان سے باہر کے ریسکیو ورکرز کی ویڈیوز وائرل ہوتی ہیں۔
اس کا یہ مطلب بالکل نہیں کہ پاکستان میں ریسکیو ورکرز اپنی ذمہ داری پوری نہیں کر رہے۔ پاکستان میں ایسے کئی واقعات ہوئے ہیں جب ریسکیو ورکرز اپنی جان پر کھیل کر انسانی جان بچاتے ہیں۔ سوشل میڈیا پر وائرل ویڈیو میں بھی کچھ ایسا ہی ہوا ہے۔
سپریٹینڈینٹ پولیس (ایس پی) عاطف نظیر کی جانب سے ٹوئیٹر پر شئیر کی گئی ویڈیو کو لوگوں کی جانب بے حد پسند کیا گیا۔
ویڈیو میں ریسکیو ورکر ایک نومولود بچے کی جان بچانے کی کوشش کر رہا ہے۔ ویڈیو میں دیکھا جاسکتا ہے کہ ایک ریسکیو ورکر ایمبولینس میں نومولود کو اپنے منہ کے ذریعے سانس دے رہا ہے۔
سوشل میڈیا پر صارفین کی جانب سے ریسکیو ورکر کی تعریف کی گئی جبکہ کئی صارفین نومولود کی صحت کے لیے بھی دعا کرتے دکھائی دیے۔