سابق افغان صدر اشرف غنی اس وقت بھرپور چرچوں میں ہیں کیونکہ حال ہی میں طالبان کی جانب سے افغانستان کی سرزمین پر قبضہ کیا گیا اور اسی دوران 15 اگست کی شام اشرف غنی موقع دیکھ کر افغانستان کے دارالحکومت کابل سے فرار ہوئے اور اس وقت متحدہ عرب امارات کی پناہ میں ہیں۔ امارات حکومت نے اشرف غنی کو انسانی بنیاد پر اپنے ملک میں جگہ دی ہے۔
اشر ف غنی نے گزشتہ روز سوشل میڈیا ویب سائٹ فیسبک پر ویڈیو لنک کے ذریعے اپنے لوگوں سے خطاب کیا جس میں انہوں نے رقم سے بھرے بیگ ساتھ لے جانے کی خبروں کی تردید کی اور کہا کہ آپ امارات کسٹم سے معلوم کر سکتے ہیں۔ اشرف غنی کا کہنا تھا کہ افغانستان میں خونریزی نہ ہو اس لیے میں افغانستان سے چلا گیا۔
اشرف غنی اس وقت اپنے اہلخانہ کے ہمراہ دبئی میں موجود ہیں۔ اشرف غنی کے اہلخانہ میں کون کون ہے آج ہم اس حوالے سے جانیں گے۔
1- سابق افغان صدر اشرف غنی کی ایک بیٹی اور بیٹا ہیں۔ ان کے بیٹے کا نام طارق غنی ہے جبکہ ان کی دختر کا نام مریم غنی ہے۔
2- ایک غیر ملکی ویب سائٹ کے مطابق اشرف غنی کے بیٹے طارق غنی ایک مشہور سوشل میڈیا شخصیت، پروفیسر، محقق، کاروباری شخصیت ہیں جو کہ امریکہ میں پرتعیش زندگی بسر کررہے ہیں۔ طارق غنی امریکا کی واشنگٹن یونیورسٹی میں بطور پروفیسر فرائض انجام دے رہے ہیں۔ طارق غنی کی عمر 39 برس بتائی گئی ہے۔ ان کی پیدائش بھی امریکہ میں ہی ہوئی۔
3- افغانستان سے فرار ہونے والے اشرف غنی کی بیٹی 42 سالہ مریم غنی بھی امریکہ کے عالیشان گھر میں پرتعیش لائف اسٹائل کے ساتھ رہ رہی ہیں۔ امریکی اخبار نیویارک پوسٹ کی رپورٹ کے مطابق مریم بروکلین کے کلنٹن ہِل میں ایک پرتعیش گھر میں رہتی ہیں۔
ویژوئل آرٹسٹ اور فلم ساز مریم غنی امریکا میں پیدا ہوئیں اور وہیں پرورش پائی، ان کے بارے کہا جاتا ہے کہ وہ غیر روایتی طرز زندگی گزار رہی ہیں جو کہ افغانستان کی عام خواتین کی زندگی سے بہت مختلف ہے۔
4- اشرف غنی کی اہلیہ کا نام رولا غنی ہے۔ رولا غنی لبنانی ہیں اور لبنان میں ایک لبنانی عیسائی خاندان میں پرورش پائی۔ انہوں نے 1969 میں سائنسز میں فرانس سے ڈپلومہ حاصل کیا۔ اس نے 1974 میں بیروت کی امریکن یونیورسٹی سے سیاسیات میں ماسٹر کی ڈگری حاصل کی اور وہیں ان کی اشرف غنی سے ملاقات ہوئی تھی۔
5- اشرف غنی کے والد کا نام شاہ پسند تھاجبکہ والدہ کا نام كوكبة لدين تھا۔