پاکستان کی جانی مانی شخصیت عامر لیاقت حسین جو اپنی تیسری شادی کی وجہ سے کافی خبروں کی زینت بنے مگر اب انہوں نے اپنی تیسری بیوی سیدہ دانیہ شاہ کے ہمراہ رمضان ٹرانسمیشن کرنے کا عندیہ دیا جس کی پوسٹ انہوں نے اپنے آفیشل انسٹاگرام اکاؤنٹ پر شئیر کی۔
ایک مقبول فیشن میگزین نے گزشتہ روز اپنی ایک انسٹاگرام پوسٹ کے ذریعے عوام کو اس بات سے آگاہ کیا تھا اور اب عامر لیاقت حسین نے بھی اپنے آفیشل انسٹاگرام اکاؤنٹ پر یہ پوسٹ شیئر کر کے اس بات کی تصدیق کی تھی تاہم اب سے کچھ دیر قبل عامر لیاقت کی جانب سے ان کے آفیشل فیسبک اکاؤنٹ پر ایک پوسٹ شئیر کی گئی جس میں انہوں نے اس بات کی تردید کی ہے اور کہا کہ وہ اپنی اہلیہ کے ہمراہ رمضان ٹرانسمیشن نہیں کریں گے۔
ِانہوں نے لکھا کہ یہ سراسر جھوٹی خبر ہے، وہ مکمل طور پر گھریلو خاتون ہیں اور کوئی ٹرانسمیشن نہیں کریں گی۔ ہاں وہ سیٹ پر میرے ساتھ ہوں گی لیکن اسکرین پر نہیں۔ تاہم میں نے ابھی تک ٹرانسمیشن کرنے کا فیصلہ نہیں کیا ہے کیونکہ میں ایک بین الاقوامی اینی میٹڈ فلم کر رہا ہوں اور اپریل میں ڈبنگ کی تاریخیں طے ہیں۔ چیزیں ابھی عمل میں ہیں۔ اس لیے اس قسم کی افواہوں سے گریز کریں۔
واضح رہے کہ کچھ روز قبل عامر لیاقت نے اسی میگزین کو انٹرویو دیتے ہوئے اپنی تیسری بیوی دانیہ شاہ کے شوبز میں آنے سے متعلق کہا تھا کہ میں دانیہ کو شوبز میں لے کر آؤں گا۔