اسلام آباد: وفاقی وزیر داخلہ رانا ثناء اللہ خان نے تحریک انصاف کے رہنماء شہباز گل کی گرفتاری کے حوالے سے کہا ہے کہ شہباز گل کو مقدمہ درج کرنے کے بعد گرفتار کیا اور 24 گھنٹوں میں عدالت میں پیش کیا، اس معاملے میں پوری قانونی کارروائی ہوگی، شہباز گل یا ڈرائیور پر تشدد کی بات غلط ہے۔
نجی چینل سے گفتگو میں رانا ثنااللہ نے کہا کہ آج عمران خان کہہ رہے ہیں کہ گرفتاری سے پہلے صفائی کا موقع دینا چاہیے، مجھ پر 15 کلو ہیروئن ڈالی گئی، کیا مجھے گرفتار کرتے وقت صفائی کا موقع دیا تھا؟۔
وزیر داخلہ نے کہا کہ شہباز گل کا بیان سب طے شدہ پروگرام تھا، یہ سارے لوگ اس میں شامل ہیں، عمران خان کی صدارت میں میٹنگ ہوئی، اگر ثبوت ملے تو عمران خان کو بھی گرفتار کیا جائے گا۔
رانا ثنا اللہ نے کہا کہ اداروں کے لوگوں کو کہا گیا کہ احکامات ملیں تو عمل نہ کریں، بیان پر نہ شہباز گل کو روکا گیا نہ مداخلت کی گئی۔ مونس الٰہی کے بیان کے بعد معلوم کرایا کہ بنی گالہ پر ایسی کوئی چیز نہیں ملی کہ پنجاب پولیس تعینات کی گئی ہو۔