سیلاب سے لوگوں کے گھر نہیں بہہ گئے بلکہ ہزاروں ایکڑ پر کھڑی فصلیں تباہ ہوگئیں جس کی وجہ سے اب ملک میں سبزیوں اور دیگر کھانے پینے کی اشیاء کی قلت ہے یہی نہیں بلکہ جو چیزیں مارکیٹ میں دستیاب ہیں ان کی قیمتیں آسمان پر پہنچ گئی۔
عوام کو ریلیف دینے کیلئے وفاقی وزیر تجارت نوید قمر کی زیر صدارت اجلاس ہوا جس میں یہ فیصلہ کیا گیا ہے کہ ٹماٹر، پیاز اور آلو ایران و افغانستان سے درآمد کیے جائیں گے۔ اس ضمن میں سمری تیار کر لی گئی ہے جبکہ اس کی فوراََ منظوری کیلئے اسے اقتصادی رابطہ کمیٹی کو بھجوانے کا فیصلہ بھی کیا گیا ہے۔
مزید یہ کہ اجلاس میں ان سبزیوں کی دستیابی کا جائزہ لیا گیا اور اس کی درآمد سے متعلق تبادلہ خیال بھی کیا گیا۔
ایرا ن و افغانستان کے ساتھ تجارتی انتظامات کے باعث فارن ایکسچینج پر کم دباؤ پڑے گا۔ وزارت تجارت کا یہ بھی کہنا ہے کہ ملک میں آئندہ 3 ماہ تک ٹماٹر اور پیاز کی قلت کا سامنا رہے گا تاہم درآمد سے ملکی منڈیوں کی قیمتوں میں کمی آئے گی۔
واضح رہے کہ وفاقی وزیر نوید قمر کا یہ بھی کہنا تھا کہ وزارت نیشنل فوڈ اینڈ سیکیورٹی قیمتوں اور دستیابی کا جائزہ لیتی رہے گی۔