وفاقی وزیر اطلاعات مریم اورنگزیب نے کہا ہے کہ وزیر مذہبی امور مفتی عبدالشکور کے حادثے کو سازش قرار دیا جارہا ہے۔
مریم اورنگزیب نے اپنے ایک حالیہ بیان میں گزشتہ دنوں وزیر مذہبی امور مفتی عبدالشکور کے حادثے میں جاں بحق ہونے کے حوالے سے اظہار خیال کیا۔ انہوں نے کہا کہ مفتی عبد الشکور کے معاملے پر 3 روز سے سازش ہو رہی ہے۔
وفاقی وزیر کا کہنا تھا کہ وزیر داخلہ رانا ثناء اللہ نے پالیسی بیان دیتے ہوئے کہا تھا کہ سازش کے کوئی شواہد نہیں ملے۔ معاملے کی تحقیقات کیلئے وزیراعظم شہباز شریف نے فیکٹ فائنڈنگ کمیٹی بھی بنائی۔
مریم اورنگزیب نے الزم لگایا کہ پاکستان تحریک انصاف (پی ٹی آئی) سوشل میڈیا پر مفتی عبدالشکور کی شہادت کی مہم چلا رہی ہے۔
خیال رہے کہ اس سے قبل پولیس کی جانب سے یہ بیان جاری کیا گیا تھا کہ مفتی عبدالشکور کی گاڑی کو ٹکر مارنے والی گاڑی کا ڈرائیور اوور اسپیڈنگ کا عادی ہے اور گاڑی کو ٹکر مارنے والی گاڑی کے ڈرائیورکو 13 چالان بھی ہو چکے ہیں۔
پولیس کے مطابق ڈرائیور کے ذمہ گاڑی کا 2600 روپے جرمانہ اس وقت بھی بقایا ہے۔ پولیس کا کہنا تھا کہ گاڑی کا نمبر نادہندگان کی فہرست میں شامل اور اس کو تھانے میں بند کرنا تھا۔