کراچی: پاکستان تحریک انصاف (پی ٹی آئی) کے گرفتار رہنما علی زیدی کی رہائش گاہ کو سب جیل قرار دے دیا گیا ہے۔
سابق وفاقی وزیر اور پی ٹی آئی سندھ کے صدر علی زیدی کی رہائش گاہ کو صوبائی محکمہ داخلہ سندھ نے سب جیل قرار دیا ہے۔
واضح رہے کہ علی زیدی کو 9 مئی کے روز شہر قائد کے علاقے کالا پل کے قریب سے گرفتار کیا گیا تھا۔
اس حوالے سے صوبائی محکمہ داخلہ سندھ کے ذمہ دار ذرائع کا کہنا ہے کہ علی زیدی کو ان کی ڈیفنس میں واقع رہائش گاہ منتقل کیا جائے گا جب کہ اطراف میں پولیس کی بھاری نفری بھی متعین رہے گی۔