پنجاب کے سابق وزیراعلٰی اور تحریک انصاف کے صدر چودھری پرویز الٰہی کو ایک اور مقدمے میں گرفتار کر لیا گیا ہے۔
سنیچر کی دوپہر پنجاب کے سابق وزیراعلٰی کو اڈیالہ جیل سے اسلام آباد کے جوڈیشل کمپلیکس لایا گیا۔پرویز الٰہی کے وکیل سردار عبدالرازق نے اردو نیوز کو بتایا کہ اُن کے مؤکل کو ڈیوٹی جج شاہ رخ ارجمند کے سامنے پیش کر کے ایک روزہ راہداری ریمانڈ حاصل کیا گیا۔ وکیل سردار عبدالرازق نے کہا کہ ’پرویز الٰہی کو 12ویں مرتبہ گرفتار کیا گیا ہے۔‘انہوں نے بتایا کہ گزشتہ دنوں ہونے والی ضمانت کے مچلکے اس لیے جمع نہیں کرائے تھے کہ ہر بار جیل کے باہر سے کسی نئے مقدمے میں حراست میں لیتے تھے۔ ’ہم نے اس پر سپریم کورٹ میں درخواست دائر کر رکھی ہے مگر اس بار پھر گرفتار کر لیا گیا۔‘اسلام آباد جوڈیشل کمپلیکس میں پیش کیے جانے کے بعد سابق وزیراعلٰی کو لاہور لے جایا جا رہا ہے۔پنجاب کے سابق وزیراعلٰی پرویز الٰہی کی پیشی کے وقت میڈیا کے جوڈیشل کمپلیکس میں داخلے پر پابندی عائد کی گئی تھی۔پرویز الٰہی کے وکیل سردار عبدالرازق عدالت میں پیش ہوئے اور دلائل میں راہداری ریمانڈ کی مخالفت کی۔سابق وزیراعلٰی کو پنجاب کے اینٹی کرپشن سیل کے حکام نے اڈیالہ جیل سے حراست میں لیا تھا۔سابق وزیراعلٰی کی دو دن قبل اسلام آباد کی انسداد دہشت گردی عدالت نے جوڈیشل کمپلیکس پر حملے کے مقدمے میں ضمانت منظور کی تھی۔