اسلام آباد۔30جنوری (اے پی پی):کل جماعتی حریت کانفرنس آزاد کشمیر و پاکستان شاخ نے کہا ہے کہ بھارت کی ہندوتوا حکومت اپنی کشمیر دشمن ظالمانہ پالیسیوں سے تنازعہ کشمیر کی حقیقت کو تبدیل نہیں کر سکتی۔
کل جماعتی حریت کانفرنس آزاد کشمیر وپاکستان کے کنوینر محمود احمد ساغر ،جنرل سیکرٹری شیخ عبدالمتین اور سیکرٹری اطلاعات امتیاز وانی نے اسلام آباد میں جاری ایک مشترکہ بیان میں مسئلہ کشمیر کو اقوام متحدہ کی قراردادوں کے مطابق حل کرنے پر زور دیتے ہوئے کہا کہ جموں وکشمیر کے بارے میں بھارت کی ہٹ دھرمی پر مبنی پالیسی نے پوری دنیا کے امن کو خطرہ میں ڈال دیا ہے ۔انہوں نے افسوس کا اظہار کیا کہ بھارت نے مقبوضہ علاقے میں کشمیریوں کی حق پر مبنی جدوجہد آزادی کو دبانے کے لئے نہتے کشمیریوں پر ظلم و تشدد ، گھروں پر چھاپوں، محاصرے اور تلاشی کی نام نہادکارروائیوں اور جبری گرفتاریوں کاسلسلہ تیز کر دیا ہے۔ حریت رہنمائوں نے بھارت پر زور دیا کہ وہ جموں وکشمیر کے حوالے سے اپنی ظالمانہ پالیسی ترک اور کشمیریوں کو ان کاناقابل تنسیخ حق خودارادیت دے کر تنازعہ کشمیر کو حل کرے۔ انہوں نے کہا کہ بھارت نے حریت قیادت اور ہزاروں کشمیری نوجوانوں کوجھوٹے اور بے بنیاد الزامات کے تحت جیلوں میں غیر قانونی طورپر قید کر رکھا ہے ۔حریت رہنمائوں نے کہاکہ کشمیری شہدا کی قربانیاں رائیگاں نہیں جائیں گی اور کشمیری ایک دن ضرور بھارتی تسلط سے آزادی حاصل کر یں گے۔انہوں نے اقوام متحدہ سے مطالبہ کیا کہ وہ مقبوضہ علاقے میں بھارتی فوج کے مظالم کا نوٹس لے اورتنازعہ کشمیر کشمیری عوام کی خواہشات اور اپنی متعلقہ قراردادوں کے مطابق حل کرے۔