اسلام آباد۔30جنوری (اے پی پی):بینک دولت پاکستان نے تمام مالیتوں کے نئے کرنسی (بینک) نوٹوں کی ڈیزائننگ پر کام شروع کردیا ہے جس کے بعد انہیں جاری کیا جائے گا۔ دنیا بھر میں مرکزی بینکوں کی یہ روایت ہے کہ وہ ہر 15سے 20سال کے بعد کرنسی نوٹوں کی نئی سیریز متعارف کراتے ہیں جس کا مقصد ان نوٹوں کی سالمیت کو محفوظ بنانا اور ان کے ڈیزائن اور سیکورٹی خصوصیات کو تازہ ترین تکنیکی پیش رفت کے مطابق بنانا ہوتا ہے۔سٹیٹ بینک سے جاری پریس ریلیز کے مطابق نئے کرنسی نوٹوں کی سیریز کی ڈیزائننگ کے سلسلے میں ابتدائی اقدام کے طور پر اسٹیٹ بینک جدید اور موضوعاتی ڈیزائن آئیڈیاز کے حصول کے لئے آرٹ کا ایک مقابلہ منعقد کر رہا ہے۔
مقامی فنکار، ڈیزائنر اور آرٹ کے طلبہ 11 مارچ 2024ء تک اپنے ڈیزائن سٹیٹ بینک کو بھیج سکتے ہیں۔ بینک نوٹوں کی موجودہ مالیتیں سات عدد ہیں اور ہر مالیت کے لیے سرِفہرست تین ڈیزائنوں کو منتخب کرکے انہیں نقد انعامات سے نوازا جائے گا۔ آرٹ کے مقابلے کے بارے میں مکمل معلومات اس لنک https://www.sbp.org.pk/ArtCompetition/ArtCompetition-U.pdf پر حاصل کی جاسکتی ہیں۔ آرٹ کے مقابلے کے نتیجے میں ڈیزائن سے متعلق سامنے آنے والے خیالات اور تصورات کا اگلا مرحلہ یہ ہوگا کہ وہ ایک اور مقابلے کے ذریعے منتخب کئے جانے والے معروف پروفیشنل بینک نوٹ ڈیزائنرز کے حوالے کئے جائیں گے جو ہر مالیت کے نوٹ کے لئے طباعت کے قابل اور حتمی ڈیزائن تیار کریں گے۔ حتمی ڈیزائن منظوری کے لئے وفاقی حکومت کو پیش کئے جائیں گے۔نئی بینک نوٹ سیریز جاری کرنے میں کئی مراحل ہوتے ہیں اس لئے اس میں بے حد محتاط منصوبہ بندی اور متعدد سٹیک ہولڈرز کے درمیان رابطہ کاری کی ضرورت ہوتی ہے۔ نئی بینک نوٹ سیریز کے اجرا میں عموماً دو سے تین سال لگتے ہیں تاہم اسٹیٹ بینک اس عمل کو اگلے دو سال کے دوران پورا کرنے کا ارادہ رکھتا ہے۔موجودہ کرنسی نوٹ نئی سیریز کے اجرا کے بعد بھی گردش میں رہیں گے۔ جب نئے نوٹ جاری ہو چکے ہوں گے اور کافی تعداد میں گردش میں آ جائیں گے تب موجودہ نوٹوں کو گردش سے نکالنے کا فیصلہ بتدریج اور مرحلہ وار کیا جائے گا۔