راولپنڈی ۔17فروری (اے پی پی):سکیورٹی فورسز نے 16 اور 17 فروری 2024 کو صوبہ خیبر پختونخوا میں دو مختلف کارروائیوں میں9 دہشت گردوں کو جہنم واصل کر دیا ۔ پاک فوج کے شعبہ تعلقات عامہ (آئی ایس پی آر) کی طرف سے ہفتہ کو جاری بیان کے مطابق ضلع ٹانک میں سیکورٹی فورسز کی جانب سے انٹیلی جنس کی بنیاد پر کئے گئے آپریشن میں دو دہشت گردمارے گئے جن میں انتہائی مطلوب دہشت گرد رحمت اللہ عرف بدرمنصور اوردہشت گرد امجد عرف بابری شامل ہیں۔ جنوبی وزیرستان میں ایک اور آپریشن کے دوران فائرنگ کے شدید تبادلے کے بعد سات دہشت گردوں کو جہنم واصل کر دیا گیا۔
ہلاک ہونے والے دہشت گردوں کے قبضے سے اسلحہ، گولہ بارود اور دھماکہ خیز مواد بھی برآمد کیا گیا، جو علاقے میں سکیورٹی فورسز کے خلاف متعدد دہشت گردی کی سرگرمیوں کے ساتھ ساتھ بھتہ خوری اور معصوم شہریوں کی ٹارگٹ کلنگ میں بھی ملوث رہے ہیں۔ تاہم آپریشن کے دوران دھرتی کے بہادر بیٹے سپاہی شاہ زیب اسلم (عمر 29 سال، ساکن ضلع ہری پور) نے دلیرانہ وارلڑتے ہوئے جام شہادت نوش کر لیا۔ پاکستان کی سیکورٹی فورسز ملک سے دہشت گردی کی لعنت کا خاتمہ کرنے کے لئے پرعزم ہیں اور ہمارے بہادر جوانوں کی ایسی قربانیاں ہمارے عزم کو مزید مضبوط کرتی ہیں۔