اسلام آباد۔18فروری (اے پی پی):کارپٹ ٹریننگ انسٹی ٹیوٹ کے چیئر پرسن اعجا زالرحمان نے کہا ہے کہ برآمدات کے فرو غ کیلئے دنیا میں بدلتے ہوئے رجحانات کی پیروی ناگزیر ہے ،حکومت برآمدی مصنوعات کی تشہیر کیلئے الگ سے ادارہ قائم کرے اوراسے ریسرچ کا کام بھی سونپا جائے ۔
اتوار کو اپنے ایک بیان میں انہوں نے کہا کہ حکومت مختلف خطوں میں بسنے والوں کے رجحان سے آگاہی ، پاکستانی مصنوعات کی مختلف ممالک کی منڈیوںتک رسائی اورخاص طور پر مصنوعات کی تشہیراور مارکیٹنگ کیلئے جامع حکمت عملی مرتب کرے ۔ انہوں نے کہا کہ ہاتھ سے بنے قالینوں کی مصنوعات پوری دنیا میں پاکستان کی منفرد پہچان کا ذریعہ ہیں،ضرورت اس امر کی ہے کہ پاکستان کے ہاتھ سے بنے قالینوں کی مصنوعات کی دنیا بھر میں موثر مارکیٹنگ کی جائے ۔ انہوں نے کہا کہ برآمدی مصنوعات کی تشہیر کے لئے الگ سے ایک ادارہ بنایا جائے جہاں برآمدی مصنوعات کی تشہیر کیلئے الگ الگ پویلینز بنائے جائیں اور اس ادارے کو ریسرچ کا کام بھی سونپا جائے جو دنیا کے مختلف ممالک میں بسنے والے لوگوں کے رجحانات اور دیگر ممالک کی برآمدات کا جائزہ لے کر سفارشات مرتب کرے ۔اعجاز الرحمان نے کہا کہ حکومت اس کیلئے پرائیویٹ سیکٹر سے مدد لے اور خاص طو رپر یونیورسٹیوں سے فارغ التحصیل نوجوانوں کو ذمہ داریاں سونپی جائیں جس سے انہیں روزگار کے مواقع بھی میسر آئیں گے۔انہوں نے کہا کہ پچیس کروڑ آبادی والے ملک کا نظام چلانے کے لئے برآمدات میں اضافہ نا گزیر ہے اس لئے کسی بھی برآمدی شعبے کو نظر انداز کرنے کی بجائے انہیں عالمی منڈیوں میں دیگر ممالک کا مقابلہ کرنے کیلئے مراعات اور سہولیات دی جائیں۔