الیکشن کمیشن نے عام انتخابات سے متعلق رپورٹ جاری کردی

اسلام آباد۔15مئی (اے پی پی):الیکشن کمیشن نے عام انتخابات سے متعلق رپورٹ جاری کردی۔ رپورٹ کے مطابق عام انتخابات میں2158 ٹن واٹر مارک پیپراستعمال کیا گیا، ملک بھر سے 17816 امیدواروں نے حصہ لیا،عام انتخابات کے لئے قومی اور چاروں صوبائی اسمبلیوں کے 859 انتخابی حلقے بنائے گئے،تین پرنٹنگ پریس سے بیلٹ پیپرز چھپوائے گئے۔

رپورٹ میں کہا گیا کہ قومی اسمبلی کے ہر ریٹرننگ افسران کو چار لیپ ٹاپ جبکہ صوبائی اسمبلی کے ریٹرننگ افسران تین لیپ ٹاپ فراہم کئے گئے،عام انتخابات میں ضابطہ اخلاق کی خلاف ورزی کرنے پر 1899 سیاسی جماعتوں اور آزاد امیدواروں کو نوٹسز جاری کئے گئے،عام انتخابات میں قومی اسمبلی دو اور صوبائی اسمبلی میں دو ٹرانس جینڈر نے حصہ لیا۔

رپورٹ میں کہا گیا ہے کہ عام انتخابات کے لئے 7 لاکھ بیلٹ باکس استعمال کئے گئے اور 1.5 لاکھ بیلٹ باکس ریزروو رکھے گئے،عام انتخابات کے دوران 10 لاکھ 3ہزار883 پولنگ سٹاف کو انتخابی عمل کے لئے تربیت دی گئی،عام انتخابات کے لئے ملک بھر میں 90 ہزار 675 پولنگ سٹیشنز قائم کئے گئے۔

رپورٹ میں کہا گیا ہے کہ مردوں کے لئے 25 ہزار 211 ، خواتین کے لئے 23 ہزار 844 جبکہ مشترکہ 41 ہزار 58 پولنگ سٹیشن قائم کئے گئے،عام انتخابات میں پولنگ کے لئے 2 لاکھ 76 ہزار 398 پولنگ بوتھ قائم کئے گئے۔