ترجمان بلوچستان حکومت شاہد رند نے کہا ہے کہ کوئٹہ سے حالیہ ایک اہم گرفتاری کے بعد تحقیقات کا دائرہ وسیع کردیا گیا ہے۔
انہوں نے بتایا کہ کچھ ٹارگٹ کلرز کے حوالے سے ایک خفیہ اطلاع ملی تھی جس کی بنیاد پر ایک سے زائد مقامات پر چھاپے مارے گئے اور متعدد مشتبہ افراد کو حراست میں لیا گیا۔ ترجمان کے مطابق ایک کارروائی کے دوران ضمیر ایڈووکیٹ بھی دیگر مشتبہ افراد کے ہمراہ تحویل میں آئے تاہم ابتدائی تحقیقات کے بعد انہیں رہا کردیا گیا۔
انہوں نے کہا کہ بلوچستان میں قیام امن کے لیے سکیورٹی فورسز کی کارروائیاں تسلسل کے ساتھ جاری ہیں، شاہد رند نے کہا کہ پہلے ہی واضح کیا جاچکا ہے کہ سکیورٹی فورسز "گرے ایریاز" میں آپریشنز کررہی ہیں جہاں دوست اور دشمن میں فرق کرنا مشکل عمل ہے۔
ان کا کہنا تھا کہ پائیدار قیام امن کے لیے اجتماعی کوششوں کی ضرورت ہے اور اس ضمن میں عوام کا تعاون ناگزیر ہے۔ ترجمان صوبائی حکومت نے واضح کیا کہ کسی بے قصور کے ساتھ ناحق نہیں ہوگا جبکہ پوچھ گچھ اور تحقیقات ایک قانونی عمل کا حصہ ہیں۔ انہوں نے کہا کہ حکومت بلوچستان امن قائم رکھنے اور صوبے کو محفوظ بنانے کے لیے اپنی کاوشیں جاری رکھے گی۔