اسلام آباد — وفاقی وزیر داخلہ محسن نقوی نے ایکس (سابقہ ٹوئٹر) پر اپنے پیغام میں انکشاف کیا ہے کہ یمن کے حوثی کنٹرول میں واقع راس العیسی بندرگاہ پر ایل پی جی ٹینکر پر اسرائیلی ڈرون حملے کے بعد 27 رکنی عملے کو حوثی جنگجوؤں نے یرغمال بنا لیا تھا۔
وزیر داخلہ کے مطابق یہ واقعہ 17 ستمبر کو پیش آیا، جب ایل پی جی ٹینکر پر اسرائیلی ڈرون نے حملہ کیا۔ جہاز میں اس وقت 24 پاکستانی، 2 سری لنکن اور ایک نیپالی شہری موجود تھے، جن میں کیپٹن مختار اکبر بھی شامل تھے۔ حملے کے نتیجے میں ایک ایل پی جی ٹینک میں آگ بھڑک اٹھی تاہم عملے نے بروقت کارروائی کرتے ہوئے آگ پر قابو پا لیا۔
اس واقعے کے بعد حوثی جنگجوؤں کی کشتیوں نے جہاز کو روک کر تمام عملے کو یرغمال بنا لیا۔ تاہم پاکستان کی اعلیٰ قیادت اور متعلقہ اداروں کی مسلسل کوششوں سے یہ مسئلہ حل ہوا۔ وزیر داخلہ نے کہا کہ سیکرٹری داخلہ خرم آغا، وزارت داخلہ کے حکام، عمان میں پاکستانی سفیر نوید بخاری اور ان کی ٹیم، سعودی عرب میں موجود پاکستانی رفقاء اور سیکیورٹی اداروں نے غیر معمولی حالات میں دن رات محنت کرکے پاکستانی شہریوں کی بحفاظت رہائی کو ممکن بنایا۔
محسن نقوی نے مزید بتایا کہ حوثیوں نے نہ صرف عملے کو رہا کر دیا ہے بلکہ جہاز بھی یمن کی سمندری حدود سے بحفاظت نکل چکا ہے۔