پاکستان کے بعض علاقوں میں بارش کا نیا سلسلہ شروع ہو گیا ہے۔ پیر کی صبح اسلام آباد، راولپنڈی، خیبر پختونخوا اور گلگت بلتستان کے کئی علاقوں میں بارش ہوئی جس سے موسم سرد ہو گیا ہے۔
پیر کی صبح اسلام آباد سمیت کئی علاقوں میں بارش کے علاوہ بیشتر مقامات پر اس وقت بھی موسم ابر آلود ہے اور بارش کے امکانات ظاہر کیے گئے ہیں۔
پیش گوئی کے مطابق آج خیبر پختونخوا، کشمیر، گلگت بلتستان، اسلام آباد اور پنجاب کے اکثر مقامات پر تیز ہوائیں، آندھی اور گرج چمک کے ساتھ بارش متوقع ہے جبکہ چند مقامات پر موسلادھار بارش کے علاوہ ژالہ باری بھی ہو سکتی ہے۔
گلگت سمیت ملک کے بالائی علاقوں میں ہلکی برفباری ہوئی ہے۔
منگل کو بالائی خیبر پختونخوا، مشرقی پنجاب، اسلام آباد، خطہ پوٹھوہار، گلگت بلتستان اور کمشیر کے کچھ علاقوں میں تیز ہوائیں چلیں گی اور گرج چمک کے ساتھ بارش بھی ہو سکتی ہے۔
اسی طرح اکتوبر کو ملک کے بیشتر علاقوں میں موسم خشک رہے گا تاہم چترال، دیر، سوات، کوہستان اور گلگت بلتستان میں مطلع جزوی طور پر ابر آلود رہنے اور تیز ہوائیں چلنے کا امکان ہے جبکہ بارش بھی ہو سکتی ہے۔
9، 10 اور 11 اکتوبر کے بارے میں بتایا گیا ہے کہ ان کے دوران ملک کے زیادہ تر علاقوں میں موسم خشک رہے گا۔
اسی طرح این ڈی ایم اے کی جانب سے بتایا گیا ہے کہ پی ڈی ایم سندھ کا وارننگ سینٹر صورت حال پر نظر رکھے ہوئے ہے اور حالات کے مطابق اپ ڈیٹس جاری کی جائیں گی۔
تازہ برفباری کے بعد دیوسائی کا حسین منظر ❄️
تازہ ترین دیوسائی اپ ڈیٹ _
5 اکتوبر 2025
گلگت بلتستان کی دلکش تفریح گاہ اور دنیا کا دوسرا بلند ترین میدان دیوسائی میں کل ہونے والی برفباری کے بعد کے خوبصورت مناظر ملاحظہ کریں
بڑا پانی میں ایک انچ برف نے وادی کو مزید دلکش بنا دیا،… pic.twitter.com/v5BGO0h0LK
— Gilgit Baltistan Tourism. (@GBTourism_) October 5, 2025
ادارے کی جانب سے یہ بھی کہا گیا ہے کہ متعلقہ اداروں کے حکام پی ڈی ایم اے کے ساتھ رابطے میں رہیں اور کسی بھی قسم کی ہدایات جاری ہونے کی صورت میں آگے کے حکام تک پہنچائیں۔
محکمہ موسمیات اور این ڈی ایم اے کی ویب سائٹس پر دی گئی تازہ ترین معلومات کے مطابق ’شکتی‘ نام کا سائیکلونک طوفان اس وقت بحیرہ عرب کے شمال مغربی حصے میں ہے جبکہ سمندر سے مربوط ہوائیں ملک کے بالائی و وسطی علاقوں میں داخل ہو رہی ہیں، جس سے ملک کے موسم پر اثر پڑ رہا ہے۔
رپورٹ کے مطابق ملک کے بالائی اور وسطی علاقوں پر مغربی ہوا کا سلسلہ اثرانداز ہو رہا ہے اور اس کی شدت بڑھنے کا بھی امکان ہے۔