وزیراعلیٰ پنجاب مریم نواز شریف کی زیرِ صدارت صوبے میں گندم کی خریداری سے متعلق ایک اہم اجلاس ہوا جس میں کاشتکاروں کے لیے بڑا فیصلہ کرتے ہوئے گندم 3500 روپے فی من کے حساب سے خریدنے کا اعلان کیا گیا۔
اجلاس میں پنجاب حکومت اور نجی شعبے کے درمیان اشتراکِ عمل پر اتفاق کیا گیا جس کے تحت کسانوں سے گندم کی خریداری 3500 روپے فی من کے نرخ پر کی جائے گی۔
گزشتہ سیزن میں گندم کی سرکاری قیمت 3900 روپے فی من مقرر کی گئی تھی لیکن اس سال مارکیٹ میں اتار چڑھاؤ کے باعث کاشتکاروں کو مناسب نرخ نہ ملنے کی شکایات موصول ہو رہی تھیں۔
وزیراعلیٰ پنجاب نے اجلاس سے خطاب کرتے ہوئے کہا کہ ہماری اولین ترجیح کسانوں کے مفادات کا تحفظ ہے۔ گندم کے کاشتکاروں کو ان کی محنت کا پورا معاوضہ ملنا چاہیے۔
انہوں نے ہدایت کی کہ کسانوں سے گندم کی خریداری کے عمل میں مکمل شفافیت یقینی بنائی جائے اور ادائیگیوں میں کسی قسم کی تاخیر نہ ہو۔
اجلاس میں صوبائی وزراء، سیکرٹری خوراک اور متعلقہ حکام نے شرکت کی اور گندم کے موجودہ ذخائر، خریداری کے اہداف اور مارکیٹ کے حالات پر تفصیلی بریفنگ دی گئی۔