ضلع کچھی کے علاقے بھاگ ناڑی میں نامعلوم مسلح افراد نے لیویز تھانے پر حملہ کر دیا۔
ذرائع کے مطابق حملہ آوروں نے تھانے پر قبضہ کرتے ہوئے لیویز اہلکاروں کو یرغمال بنالیا اور بعدازاں تھانے کو نذرِ آتش کردیا۔
علاقے میں فائرنگ اور زور دار دھماکوں کی آوازیں سنائی دیتی رہیں، جس سے شہریوں میں شدید خوف و ہراس پھیل گیا۔ فائرنگ کے تبادلے کے دوران انسپکٹر لطف علی کھوسہ جاں بحق ہوگئے۔
ذرائع کا کہنا ہے کہ حملے کے بعد مسلح افراد شہر میں آزادانہ گشت کر رہے ہیں، جبکہ لیویز اور دیگر قانون نافذ کرنے والے ادارے علاقے میں پہنچنے کی کوشش کر رہے ہیں۔
علاقے میں صورتِ حال انتہائی کشیدہ ہے اور رابطے کے ذرائع بھی متاثر ہوئے ہیں۔ حکام کی جانب سے ابھی تک واقعے پر کوئی باضابطہ بیان جاری نہیں کیا گیا۔