بانی پاکستان تحریک انصاف کو آئندہ تمام عدالتی سماعتوں میں اڈیالہ جیل سے ویڈیو لنک کے ذریعے پیش کرنے کا فیصلہ کیا گیا ہے۔
ذرائع کے مطابق بانی پی ٹی آئی کے خلاف زیرِ سماعت تمام مقدمات کی کارروائی اب انسدادِ دہشت گردی کی عدالت میں ہو گی۔ سیکیورٹی اداروں اور عدالتی حکام نے خدشہ ظاہر کیا ہے کہ جیل سے باہر پیشی کے دوران کسی بھی ممکنہ ہنگامہ آرائی یا ناخوشگوار واقعے سے بچنے کے لیے یہ قدم اٹھایا گیا ہے۔
پراسیکیوشن کے مطابق بانی پی ٹی آئی پر بغاوت، اشتعال انگیزی اور عوامی املاک کو نقصان پہنچانے جیسے سنگین الزامات عائد ہیں۔
دوسری جانب بانی پی ٹی آئی کی قانونی ٹیم نے اس فیصلے پر تحفظات کا اظہار کرتے ہوئے مؤقف اختیار کیا ہے کہ ویڈیو لنک کے ذریعے پیشی انصاف کی فراہمی میں رکاوٹ پیدا کر سکتی ہے۔ وکلا کے مطابق اس فیصلے کے خلاف قانونی چارہ جوئی پر غور کیا جا رہا ہے۔
یاد رہے کہ بانی تحریک انصاف اس وقت اڈیالہ جیل میں قید ہیں اور ان کے خلاف مختلف نوعیت کے درجنوں مقدمات زیرِ سماعت ہیں۔