ملک بھر میں ہائی اسپیڈ ڈیزل کی شدید کمی کے خلاف پیٹرول پمپ ڈیلرز ایسوسی ایشن نے حکومت کو باقاعدہ طور پر آگاہ کر دیا ہے اور صورتحال پر فوری کارروائی کا مطالبہ کیا ہے۔
پیٹرول پمپ ڈیلرز ایسوسی ایشن کے وائس چیئرمین نعمان علی بٹ کی جانب سے چیئرمین اوگرا مسرور خان کو ایک خط ارسال کیا گیا ہے جس میں مؤقف اختیار کیا گیا ہے کہ گزشتہ ایک ہفتے سے آئل مارکیٹنگ کمپنیاں (OMCs) ڈیزل کی فراہمی پر کپنگ/کوٹہ لگا رہی ہیں، جس کے باعث پمپوں پر ایندھن کی شدید قلت پیدا ہوگئی ہے۔
خط کے مطابق OMCs یا تو ہائی اسپیڈ ڈیزل فراہم نہیں کر رہیں، یا اتنی کم مقدار دے رہی ہیں کہ عوام اور فیول اسٹیشنز کی ضروریات پوری نہیں ہو رہیں، آرڈر وصول کیے جانے کے بعد بار بار منسوخ ہو رہے ہیں، ٹینکرز گھنٹوں لائنوں میں پھنسے رہتے ہیں اور ڈیزل نہیں ملتا۔
ایسوسی ایشن نے دعویٰ کیا ہے کہ پیٹرولیم مصنوعات کی ممکنہ قیمتوں میں متوقع اضافے کے باعث OMCs نے ’’مصنوعی قلت‘‘ پیدا کی ہے۔
خط میں مطالبہ کیا گیا ہے کہ اوگرا فوراً OMCs کو ہدایت دے کہ وہ کم از کم سیلز کے مطابق ڈیزل کی فراہمی یقینی بنائیں، ورنہ ایسوسی ایشن کو میڈیا کے ذریعے احتجاج اور پریس کانفرنس کرنے پر مجبور ہونا پڑے گا۔
خط کی کاپی وزیر پیٹرولیم، سیکریٹری پیٹرولیم، ڈی جی آئل اور سیکریٹری او سی اے سی کو بھی ارسال کی گئی ہے۔ ملک میں ڈیزل کی قلت کے باعث ٹرانسپورٹ اور زرعی شعبے کو بھی مشکلات کا سامنا ہے، جبکہ عوام شدید پریشانی میں مبتلا ہیں۔