چیف آف جنرل اسٹاف پاک فوج لیفٹیننٹ جنرل سید عامر رضا نے ریاض میں سعودی عرب کے چیف آف جنرل اسٹاف جنرل فیاض بن حمید الروايلي سے ملاقات کی۔ ملاقات میں باہمی تزویراتی تعاون، دفاعی روابط کے فروغ اور اسٹریٹجک میوچول ڈیفنس ایگریمنٹ (SMDA) کے تحت اشتراکِ عمل بڑھانے پر تفصیلی تبادلہ خیال کیا گیا۔
دونوں رہنماؤں نے پاکستان اور سعودی عرب کے دیرینہ برادرانہ تعلقات کو مزید گہرا کرنے اور خطے میں امن، استحکام اور خود انحصاری کے فروغ کے عزم کا اعادہ کیا۔
ریاض میں پاکستان سعودی عرب دوطرفہ دفاعی انڈسٹریل فورم کا خصوصی اجلاس بھی منعقد ہوا۔ پاکستان کی ٹری سروسز وفد کی قیادت لیفٹیننٹ جنرل سید عامر رضا نے کی جبکہ سعودی وفد کی قیادت ہائیر ایجوکٹیو اتھارٹی کے اسسٹنٹ وزیر دفاع خالد البیاری نے کی۔
اجلاس میں جاری دفاعی تعاون کے منصوبوں کی پیش رفت کا جائزہ لیا گیا اور ابھرتی ہوئی ٹیکنالوجیز میں مشترکہ منصوبہ بندی اور نئے دفاعی صنعتی اشتراک پر مشاورت ہوئی، جو سعودی عرب کے ویژن 2030 سے ہم آہنگ ہے۔
چیف آف جنرل اسٹاف نے سعودی شاہی دفاعی افواج کی صلاحیت کار میں اضافے کیلیے پاکستان کے بھرپور تعاون کے عزم کا اظہار کیا۔ سعودی قیادت نے پاکستان کی دہشت گردی کے خلاف قربانیوں، کارکردگی اور خطے میں امن کے لیے اہم کردار کو سراہا۔