امریکی صدر ڈونلڈ ٹرمپ سعودی کلب النصر کے پرتگالی اسٹار فٹبالر کرسٹیانو رونالڈو سے حالیہ ملاقات کے اس قدر متاثر ہوئے کہ انہوں نے دونوں کی فٹبال کھیلتے ہوئے اے آئی سے تیار کردہ ویڈیو اپنے سوشل پلیٹ فارم پر شیئر کر دی۔
ویڈیو میں دکھایا گیا ہے کہ ٹرمپ اور رونالڈو وائٹ ہاؤس کے اوول آفس میں موجود ہیں جہاں چھت سے نیچے آنے والی فٹبال کو دونوں کھلاڑی ہیڈ سے تھرو کرتے ہیں۔ ویڈیو کے اختتام پر ٹرمپ اپنے پیروں پر گھوم کر گیند روکتے ہیں اور کیمرے کی جانب زور دار کک لگاتے ہیں۔
ٹرمپ نے کیپشن میں رونالڈو کی تعریف کرتے ہوئے لکھا کہ رونالڈو ایک شاندار شخص ہیں ان سے وائٹ ہاؤس میں ملاقات میرے لیے خوشی کا باعث بنی۔ وہ بہت ذہین اور بےحد کُول ہیں۔
یہ ویڈیو سعودی ولی عہد شہزادہ محمد بن سلمان کے اعزاز میں 18 نومبر کو ہونے والے عشائیے کے بعد شیئر کی گئی جس کے بعد سوشل میڈیا پلیٹ فارمز پر تیزی سے وائرل ہو گئی۔ صارفین کی بڑی تعداد ٹرمپ اور رونالڈو کو ایک ساتھ دیکھ کر حیرت اور دلچسپی کا اظہار کر رہی ہے۔