یمن میں حوثی تنظیم انصار اللّٰہ کی عدالت نے جاسوسی کے مقدمات میں 17 افراد کو سزائے موت سنا دی۔
یمنی دارالحکومت صنعاء میں حوثی انتظامیہ کی عدالت نے ایسے متعدد افراد کو سزائے موت سنائی جو مبینہ طور پر سعودی عرب، برطانیہ اور امریکا کے لیے کام کرنے والے خفیہ نیٹ ورک کا حصہ تھے۔
سرکاری میڈیا رپورٹ میں بتایا گیا کہ مجرموں پر 2024 سے 2025 کے درمیان حوثی مخالف ممالک کے انٹیلی جنس اہلکاروں کے ساتھ تعاون اور ان کو حساس معلومات فراہم کرنے کا الزام تھا۔
عدالتی فیصلے میں کہا گیا کہ ملزمان نے مخالف ممالک کو سرکاری افسران اور ان کی نقل و حرکت سے متعلق معلومات اور حوثی باغیوں کے میزائل سسٹمز سے متعلق خفیہ تفصیل بھی فراہم کیں۔
فیصلے میں کہا گیا کہ ملزمان کی جانب سے مختلف حساس تنصیبات کے مقامات کی تفصیل مخالفین کو فراہم کرنے کے نتیجے میں فوجی، سیکیورٹی اور شہری علاقوں پر حملے ہوئے جن میں متعدد افراد ہلاک ہوئے۔
عدالت نے تمام مجرموں کو فائرنگ اسکواڈ کے ذریعے سزائے موت کا حکم دیا ہے۔