وزیرِ اعظم شہباز شریف کا کہنا ہے کہ قومی ایئرلائن کی نجکاری کے لیے بڈنگ کا عمل 23 دسمبر کو ہوگا جبکہ اس پورے عمل کو میڈیا پر براہِ راست نشر کیا جائے گا تاکہ شفافیت یقینی بنائی جا سکے۔
وزیراعظم ہاؤس میں قومی ایئرلائن کی نجکاری میں حصہ لینے والی کمپنیوں کے نمائندوں سے ملاقات کے دوران وزیرِ اعظم نے کہا کہ حکومت کے نزدیک شفافیت، میرٹ اور بین الاقوامی معیار کے مطابق نجکاری سب سے بڑی ترجیح ہے۔
شہباز شریف نے کہا کہ قومی ایئرلائن کی دنیا بھر میں پروازوں کی بحالی سے اوورسیز پاکستانیوں کو بڑی سہولت میسر آئے گی اور قومی رابطے بہتر ہوں گے۔ وزیراعظم نے مزید کہا کہ پاکستان کے سیاحتی شعبے کی ترقی کے لیے بھی ضروری ہے کہ قومی ایئرلائن کو جدید تقاضوں کے مطابق ڈھالا جائے۔
انہوں نے امید ظاہر کی کہ بڈنگ میں کامیاب ہونے والا سرمایہ کار ایئرلائن کا انتظام سنبھالنے کے بعد پی آئی اے کی ساکھ اور تشخص کی بحالی کے لیے اپنی بھرپور کوششیں کرے گا۔