11ویں قومی مالیاتی کمیشن (این ایف سی) کے افتتاحی اجلاس میں مالیاتی امور کو آگے بڑھانے کے لیے ورکنگ گروپس بنانے کا فیصلہ کیا گیا ہے۔ اجلاس وزیر خزانہ سینیٹر محمد اورنگزیب کی سربراہی میں ہوا جس میں چاروں صوبوں کے وزرائے اعلیٰ، وزرائے خزانہ اور دیگر اراکین شریک تھے۔
اجلاس میں وفاق اور صوبوں نے اپنی مالی پوزیشن پر تفصیلی بریفنگ دی اور آئینی ذمہ داریوں کے تحت مشترکہ تعاون کا عزم ظاہر کیا۔ وزیر خزانہ نے کہا کہ این ایف سی اجلاس کا مقصد شفاف مکالمے کے ذریعے قومی مفاد میں وسائل کی منصفانہ تقسیم کو یقینی بنانا ہے۔
ذرائع کے مطابق اجلاس میں 6 سے 7 ورکنگ گروپس تشکیل دینے کا فیصلہ کیا گیا ہے جبکہ سابق فاٹا کے مالی امور کے لیے الگ گروپ بھی بنایا جائے گا۔ این ایف سی کا اگلا اجلاس 8 یا 15 جنوری کو متوقع ہے۔
وزارت منصوبہ بندی نے وسائل کی تقسیم کے دو نئے طریقہ کار پر تجاویز پیش کی ہیں جن کے تحت دہشت گردی کے خلاف جنگ، واٹر سیکیورٹی، سول آرمڈ فورسز اور گلگت بلتستان و آزاد کشمیر کے گرانٹس کے لیے ساڑھے 57 فیصد وسائل صوبوں اور ساڑھے 42 فیصد وفاق کو فراہم کیے جائیں گے۔
مزید برآں تجاویز میں آبادی کے بجائے ریونیو جنریشن، زرعی پیداوار اور جنگلاتی احاطے کو وزن دینے کی سفارش بھی شامل ہے تاکہ صوبوں کے حق میں وسائل کی منصفانہ تقسیم یقینی بنائی جا سکے۔