وزیر دفاع خواجہ محمد آصف نے خیبر پختونخوا کی صوبائی حکومت کے دہشت گردی کے خلاف دعوؤں کو شدید تنقید کا نشانہ بناتے ہوئے کہا ہے کہ صوبائی حکومت اونرشپ تو لے رہی ہے مگر دہشت گردی کے خلاف حقیقی لڑائی سیکیورٹی فورسز نے لڑی اور اب بھی وہی لڑ رہی ہیں۔
خواجہ آصف کا کہنا تھا کہ کون سا وزیرِ اعلیٰ خیبر پختونخوا دہشت گردی کے خلاف جنگ لڑ رہا ہے؟ جنگ تو افواجِ پاکستان، ایف سی اور دیگر سیکیورٹی ادارے لڑتے آئے ہیں۔
انہوں نے کہا کہ اگر کوئی سیاسی جماعت دہشت گردی کے خلاف مؤثر کردار ہی ادا نہیں کر سکتی اور پاکستان کی بقاء کی جنگ میں شریک نہیں ہو سکتی تو ایسی جماعت کو اس معاملے پر سیاسی کریڈٹ لینے کا کوئی حق نہیں۔
وزیر دفاع نے کہا کہ سیکیورٹی فورسز کی قربانیوں اور کارکردگی کی وجہ سے ملک میں امن قائم ہوا ہے، اس لیے صوبائی حکومتیں زمینی حقائق کو تسلیم کریں اور سیکیورٹی اداروں کی کوششوں کو سیاسی رنگ دینے سے گریز کریں۔