ترجمان دفتر خارجہ نے تصدیق کی ہے کہ پاکستان نے افغانستان میں عوام کی بڑھتی مشکلات کو دیکھتے ہوئے اقوامِ متحدہ کی درخواست پر امدادی قافلہ روانہ کردیا ہے۔
ترجمان کے مطابق پاکستان کی جانب سے بھیجا جانے والا امدادی قافلہ مکمل طور پر کلیئر ہے اور سرحد تک پہنچایا جا چکا ہے۔ ترجمان نے کہا کہ اب فیصلہ طالبان قیادت پر ہے کہ وہ اس امدادی قافلے کو وصول کرتے ہیں یا نہیں۔
ان کا کہنا تھا کہ پاکستان نے اپنے حصے کی تمام ضروری کارروائی مکمل کردی ہے، تاہم اس کے باوجود افغان قیادت سے تحریری ضمانتیں طلب کی گئی ہیں تاکہ امداد کی محفوظ ترسیل یقینی بنائی جاسکے۔
دفتر خارجہ کے مطابق افغانستان میں ہونے والی قرارداد کا مسودہ پاکستان نے نہیں دیکھا، اس لیے اس پر کوئی تبصرہ کرنا قبل از وقت ہوگا۔ ترجمان نے مزید کہا کہ پاکستان خطے میں انسانی بنیادوں پر امدادی سرگرمیوں کی حمایت جاری رکھے گا اور افغان عوام کی مدد کے لیے ہر ممکن تعاون فراہم کرتا رہے گا۔