پاکستان پیپلز پارٹی کے چیئرمین بلاول بھٹو زرداری نے کہا ہے کہ بانی پی ٹی آئی آج مکافاتِ عمل سے گزر رہے ہیں اور انہیں اپنی سیاسی زندگی میں کیے گئے اعمال کا جواب دینا پڑ رہا ہے۔
ایک بیان میں انہوں نے کہا کہ بانی پی ٹی آئی نے سیاست میں غلط روایات متعارف کرائیں اور طاقت کے نشے میں رہ کر مخالفین کو دھمکیاں دیتے رہے۔
بلاول بھٹو زرداری نے سابق ڈی جی آئی ایس آئی لیفٹیننٹ جنرل (ر) فیض حمید کے حوالے سے کہا کہ وہ بھی طاقت کے نشے میں اپنے حلف کی خلاف ورزی کرتے رہے۔ انہوں نے کہا کہ فیض حمید کو دی گئی سزا اس بات کا واضح پیغام ہے کہ آئندہ اس قسم کی غلطیاں برداشت نہیں کی جائیں گی۔ بلاول کے مطابق فیض حمید کے خلاف مزید تحقیقات اور ٹرائل ابھی باقی ہیں۔
چیئرمین پیپلز پارٹی کا کہنا تھا کہ آئین میں گورنر راج کا آپشن موجود ضرور ہے، تاہم خیبر پختونخوا میں گورنر راج سے متعلق کوئی بات نہیں ہوئی۔ انہوں نے سیاسی قیادت پر زور دیا کہ آئین اور قانون کی بالادستی کو ہر حال میں یقینی بنایا جائے۔
بلاول بھٹو نے کہا کہ ریاست کو ایسے اقدامات کی ضرورت ہے جو ملک میں استحکام لائیں، جبکہ عوام نے پہلے ہی سیاست میں نفرت، دھمکیوں اور انتشار کی سیاست کو مسترد کر دیا ہے۔