سینیٹر فیصل واؤڈا نے کہا ہے کہ فیض حمید کے خلاف فیصلہ ابھی ابتدائی مرحلے میں ہے اور پاکستان کی 72 سالہ تاریخ میں ایسے فیصلے نہیں ہوئے۔ انہوں نے مزید بتایا کہ 9 مئی سمیت کئی دیگر کیسز کے فیصلے ابھی باقی ہیں۔
انہوں نے کہا کہ ماضی میں جو کچھ کہا گیا تھا وہ آج حقیقت میں تبدیل ہو رہا ہے، اور جس نے بھی زیادتی کی وہ سزا پائے گا۔ ان کا کہنا تھا کہ پاکستان کے لیے نیا سورج طلوع ہو رہا ہے اور احتساب کا تسلسل جاری رہے گا۔
فیصل واؤڈا نے کہا کہ آج انصاف کی بنیاد رکھ دی گئی ہے اور بانی پارٹی کے لیے مشکلات بڑھنے والی ہیں۔ انہوں نے دعویٰ کیا کہ 9 مئی کے واقعے میں ملوث پی ٹی آئی کے افراد نے بھی شواہد فراہم کیے ہیں۔
سینیٹر نے مزید کہا کہ اب کوئی سیاسی جماعت غنڈہ گردی نہیں کر سکے گی اور پی ٹی آئی اب صرف سوشل میڈیا کی جماعت رہ گئی ہے۔ ان کا کہنا تھا کہ اب نفرت اور انتشار کے لیے کوئی گنجائش نہیں اور سب کے خلاف احتساب کا عمل ہو۔