راولپنڈی کے اڈیالہ جیل میں آج بانی پاکستان تحریک انصاف سے سیاسی رہنماؤں کی ملاقاتوں کا سلسلہ جاری رہنے کا امکان ہے۔ تحریک انصاف نے ملاقات کے لیے چھ رہنماؤں کی فہرست جیل حکام کو بھجوا دی ہے۔
فہرست میں خیبر پختونخوا کے وزیرِ اعلیٰ سہیل آفریدی کا نام بھی شامل کر دیا گیا ہے، جو آج ایک بار پھر بانی پی ٹی آئی سے ملاقات کے لیے اڈیالہ جیل آئیں گے۔ وزیراعلیٰ کے ہمراہ دیگر پارٹی رہنما بھی شریک ہوں گے۔
پی ٹی آئی کی جانب سے بھجوائی گئی فہرست میں شامل دیگر رہنماؤں میں ارشد ایوب، ریاض خان، عاصم خان، مرزا آفریدی اور اعجاز خان کے نام شامل ہیں۔
خیال رہے کہ وزیراعلیٰ کے پی سہیل آفریدی گزشتہ روز بھی بانی پی ٹی آئی سے ملاقات کے لیے جیل آئے تھے، جب کہ آج ایک مرتبہ پھر اہم مشاورت کے لیے ان کی آمد متوقع ہے، اڈیالہ جیل کے باہر سیکیورٹی کے سخت انتظامات کیے گئے ہیں۔