امریکا نے پاکستان کے ایف-16 لڑاکا طیاروں کی جدید اپ گریڈیشن کے لیے 686 ملین ڈالر کا پیکیج منظور کرلیا ہے۔
عرب نیوز کے مطابق یہ منظوری امریکی ڈیفنس سیکیورٹی کو آپریشن ایجنسی کے خط میں کانگریس کو بھیجی گئی، جس میں نئے معاہدے میں 16 ڈیٹا لنک سسٹم، کرپٹوگرافک آلات، ایویانکس اپ گریڈ، تربیتی ماڈیولز اور جامع پائیداری سپورٹ شامل ہونے کا ذکر کیا گیا ہے۔ اس اقدام کا مقصد پاکستان کے ایف-16 بیڑے کو جدید اور مضبوط بنانا ہے۔
امریکا کی جانب سے یہ اقدام اسلام آباد اور واشنگٹن کے درمیان جاری انسدادِ دہشت گردی کی کوششوں کو مزید تقویت دینے کے مترادف ہے۔
پاکستانی دفتر خارجہ نے ایف-16 اپ گریڈیشن پیکیج کی منظوری کا خیرمقدم کرتے ہوئے اسے دونوں ممالک کے معمول کے دفاعی تعاون کا حصہ قرار دیا ہے۔
واضح رہے کہ پاکستان نے پہلی بار 1980 کی دہائی میں امریکا سے ایف-16 جنگی طیارے خریدے تھے۔