مراکش کے بحر اوقیانوس کے ساحلی صوبے صافی میں طوفانی بارشوں کے نتیجے میں آنے والے سیلاب سے جانی و مالی نقصان ہوا۔ غیر ملکی میڈیا رپورٹس کے مطابق کم از کم 37 افراد ہلاک اور متعدد لاپتا ہو گئے ہیں۔
ماہرین کے مطابق مراکش سات سال کی شدید خشک سالی کے بعد اٹلس کے پہاڑوں پر شدید بارش اور برف باری کا سامنا کر رہا ہے جس کے نتیجے میں سیلاب نے کئی علاقوں کو متاثر کیا۔
رپورٹس کے مطابق سیلاب کے باعث کم از کم 70 مکانات اور دکانیں بھی زیر آب آ گئی ہیں زخمی افراد کو طبی امداد فراہم کی جا رہی ہے اور لاپتا افراد کی تلاش کے لیے سرچ اینڈ ریسکیو آپریشن جاری ہے۔
ہنگامی صورتحال کے پیش نظر اسکولوں کو تین روز کے لیے بند کر دیا گیا ہے جس کے باعث تعلیمی نظام بھی متاثر ہوا ہے۔ حکام نے عوام سے محتاط رہنے اور ہنگامی اقدامات پر عمل کرنے کی ہدایت کی ہے۔