بنگلا دیش کرکٹ بورڈ نے پاکستان کرکٹ بورڈ سے مدد مانگ لی ہے کہ وہ آئی سی سی میں ان کا ساتھ دے کیونکہ وہ اب ٹی ٹوئنٹی ورلڈ کپ میں بھارت جا کے نہیں کھیلنا چاہتے۔
ذرائع نے بتایا کہ بنگلا دیش نے پی سی بی کے چیئرمین محسن نقوی سے درخواست کی ہے کہ وہ بھی آئی سی سی پر زور دیں کہ بنگلا دیش نے جو آئی سی سی سے مطالبہ کیا ہے کہ ان کے میچز سری لنکا میں کرائے جائیں اس کو دیکھیں۔
بدھ کو خبریں گردش کر رہی ہیں کہ آئی سی سی نے بنگلا دیش کا مطالبہ ماننے سے انکار کر دیا ہے اور ان سے کہا ہے کہ اگر وہ بھارت میں نہیں کھیلنا چاہتے تو اپنے میچز کے پوائنٹس چھوڑ دیں۔
بنگلا دیش کرکٹ بورڈ نے فیصلہ کیا کہ جس طریقے سے ان کے کھلاڑی مستفیض الرحمان کو سیاسی بنیادوں پر انڈین پریمیئر لیگ سے نکالا گیا ان کو تشویش ہے کہ بنگلا دیش ٹیم کو بھارت میں کھیلتے ہوئے ہندو انتہا پسند تنظیموں سے خطرہ نہ ہو، اس لیے وہ چاہتے ہیں کہ آئی سی سی ان کے میچز سری لنکا میں کرا دیں۔
پاکستان ورلڈ کپ کے اپنے تمام میچز سری لنکا میں ہی کھیل رہا ہے کیونکہ جب پچھلے سال چیمپینز ٹرافی کے لیے بھارت کی ٹیم نے پاکستانی سے انکار کیا تھا تو محسن نقوی نے آئی سی سی اور بھارتی کرکٹ بورڈ کو یہ باور کرا دیا تھا کہ جب تک بھارت کی ٹیم کسی بھی آئی سی سی یا ایشن کرکٹ کونسل کے ایونٹ میں پاکستان آ کر نہیں کھیلے گی تو پاکستان بھی بھارت میں کوئی میچ نہیں کھیلے گا، اس لیے آئی سی سی نے پاکستان کے تمام میچز سری لنکا میں رکھے ہوئے ہیں۔
بنگلا دیش اور بھارتی حکومتوں کے درمیان تعلقات کشیدہ ہوگئے ہیں جس کی وجہ سے بھارت نے پچھلے سال بنگلا دیش جانے سے انکار کردیا تھا اور وہ سیریز اب اس سال ستمبر میں ہونی ہے۔