نیشنل الیکٹرک پاور ریگولیٹری اتھارٹی (نیپرا) نے بجلی کے صارفین کے لیے بیک وقت ریلیف اور اضافے کا اعلان کر دیا ہے۔ نیپرا نے فی یونٹ بجلی 93 پیسے سستی کرنے کا نوٹیفکیشن جاری کر دیا ہے، جو نومبر کی فیول پرائس ایڈجسٹمنٹ کی مد میں کیا گیا ہے۔
اعلامیے کے مطابق کراچی سمیت ملک بھر کے صارفین کو اس کمی کا فائدہ جنوری کے بجلی کے بلوں میں ملے گا، تاہم لائف لائن صارفین اس ریلیف سے مستثنیٰ ہوں گے۔
دوسری جانب نیپرا نے یکم جنوری سے بجلی کی قیمت میں فی یونٹ ایک روپے 79 پیسے اضافے کی بھی منظوری دے دی ہے۔ اضافے کے بعد جنوری 2026 سے بجلی کا اوسط فی یونٹ نرخ 33 روپے 38 پیسے مقرر کر دیا گیا ہے، جبکہ اس وقت ملک میں اوسط بنیادی نرخ 31 روپے 59 پیسے فی یونٹ نافذ العمل ہیں۔
نیپرا کا بجلی مہنگی کرنے کا فیصلہ منظوری کے لیے وفاقی حکومت کو ارسال کر دیا گیا ہے جس کا اطلاق حکومتی منظوری کے بعد ہوگا۔ بجلی کی قیمتوں میں کمی اور اضافے کے بیک وقت فیصلوں پر صارفین میں تشویش پائی جا رہی ہے۔