پاکستان کرکٹ بورڈ نے پاکستان سپر لیگ کی فرنچائز ملتان سلطانز کی نیلامی کے لیے اشتہار جاری کردیا ہے۔
اشتہار میں کہا گیا ہے کہ جو بھی کمپنیاں یا حضرات نیلامی میں حصہ لینے کے خواہشمند ہیں وہ اپنی ضروری دستاویزات 30 جنوری تک جمع کرا دیں اور فروری کے پہلے ہفتے میں ملتان سلطان کو آکشن کردیا جائے گا۔
یاد رہے کہ ملتان سلطان کے سابقہ مالک علی ترین نے پھر سے ملتان سلطان کو حاصل کرنے میں دلچسپی ظاہر کی ہے۔ انہوں نے دسمبر کے شروع میں پی سی بی کے کے ساتھ کچھ تنازعات کے بعد ملتان سلطان کی ملکیت چھوڑ دی تھی لیکن حالیہ دنوں میں پی سی بی کے چیئرمین محسن نقوی نے ان سے میٹنگ کر کے معاملات حل کرا دیے اور کہا کہ علی ترین اگر پی ایس ایل میں دو نئی ٹیموں کے آکشن میں یا ملتان سلطان کو پھر لینے میں دلچسپی رکھتے ہو تو وہ اس کا خیر مقدم کریں گے۔
پاکستان کرکٹ بورڈ کے ایک عہدے دار کا کہنا ہے کہ حالیہ آکشن میں حیدرآباد اور سیالکوٹ کی ٹیمیں زیادہ پیسوں پر بکی جس کے بعد یہ فیصلہ ہوا کہ ملتان سلطان کی ٹیم کو بھی پی ایس ایل 11 شروع ہونے سے پہلے فروخت کردیا جائے۔ پی سی بی نے پہلے اعلان کیا تھا کہ پی ایس ایل 11 میں وہ ملتان سلطان کی باگ ڈور خود سنبھالیں گے۔
پی ایس ایل کے سی ای او سلمان نصیر نے ایک انٹرویو میں کہا کہ لیگ اس وقت اوپر جا رہی ہے اور اس بات کا اندازہ اس چیز سے لگایا جا سکتا ہے کہ دونوں نئی ٹیمیں باہر کے لوگوں نے خریدی ہیں۔ انہوں نے کہا کہ پی سی بی کا مقصد پی ایس ایل کو دنیا کی بہترین لیگ بنانا ہے اور 8 ٹیمیں شامل ہونے کے بعد لیگ اور زیادہ دلچسپ ہوجائے گی اس کی آمدنی میں بھی مزید اضافہ ہوگا۔