پاکستان کرکٹ بورڈ نے ساؤتھ افریقہ کے خلاف ون ڈے اور ٹی ٹوئنٹی سیریز کے لیے خواتین کی قومی اسکواڈز کا اعلان کردیا ہے، فاطمہ ثنا ٹیم کی کپتانی کریں گی۔
پاکستان کی خواتین ٹیم 10 فروری سے دورے کا آغاز کرے گی اور فاطمہ ثنا دونوں فارمیٹس میں ٹیم کی قیادت کریں گے۔
پی سی بی کے مطابق سائرہ جبین اور ہمنہ بلال کو اسکواڈ میں پہلی بار شامل کیا گیا ہے۔
عائشہ ظفر، گل فیروزہ، تسمیہ رباب اور نجیہہ علوی کی ون ڈے اسکواڈ میں واپسی ہوئی ہے۔
قومی سلیکٹرز نے یہ بھی فیصلہ کیا ہے کہ عائشہ ظفر، گل فیروزہ، منیبہ علی، نصرہ سندھو اور عالیہ ریاض دونوں فارمیٹس کا حصہ ہوں گی، جبکہ ڈیانہ بیگ، نجیہہ علوی، صدف شمس اور سیدہ عروب شاہ صرف ون ڈے اسکواڈ میں شامل ہیں۔
ہمنہ بلال، سائرہ جبین، طوبیٰ حسن اور ایمان فاطمہ صرف ٹی ٹوئنٹی اسکواڈ کا حصہ ہیں۔
پی سی بی نے کہا ساؤتھ افریقہ کا یہ دورہ ٹیم کو آئی سی سی ویمنز ٹی ٹوئنٹی ورلڈ کپ کی تیاریوں حصہ ہے۔
پری سیریز ٹریننگ کیمپ یکم سے 6 فروری تک کراچی میں ہوگا۔
ساؤتھ افریقہ کے خلاف ٹی ٹوئنٹی سیریز کے تمام میچز ڈے اینڈ نائٹ ہوں گے اور پوچف سٹروم، بینونی اور کمبرلے میں کھیلے جائیں گے اور ون ڈے میچز بلوم فونٹین، سینچورین اور ڈربن میں کھیلے جائیں گے۔
پاکستان ویمنز ٹیم 5 سال بعد دو طرفہ سیریز کے لیے جنوبی افریقہ کا دورہ کرے گی۔
کوچنگ اسٹاف میں مینٹور وہاب ریاض، عمران فرحت، عبد الرحمٰن اور عبدالمجید شامل ہیں۔ ٹیم منیجر عائشہ اشعر جبکہ میڈیا منیجر رضا راشد کچلو ہوں گے۔
پاکستان ویمنز ٹیم نے فروری 2023 میں جنوبی افریقہ میں آئی سی سی ویمنز ٹی ٹوئنٹی ورلڈ کپ میں بھی شرکت کی تھی۔
پاکستان ویمنز ٹی ٹوئنٹی انٹرنیشنل اسکواڈ میں فاطمہ ثنا (کپتان)، عالیہ ریاض، عائشہ ظفر، ایمان فاطمہ، گل فیروزہ (وکٹ کیپر)، ہمنہ بلال، منیبہ علی (وکٹ کیپر)، نشرا سندھو، نتالیا پرویز، رامین شمیم، سعدیہ اقبال، سائرہ جبین، سدرہ امین، تسمیہ رباب اورطوبیٰ حسن شامل ہیں۔
پاکستان ویمنز ون ڈے انٹرنیشنل اسکواڈ میں فاطمہ ثنا (کپتان)، عالیہ ریاض، عائشہ ظفر، ڈیانا بیگ، گل فیروزہ، منیبہ علی (وکٹ کیپر)، نجیہہ علوی (وکٹ کیپر)، نشرا سندھو، نتالیا پرویز، رامین شمیم، صدف شمس، سعدیہ اقبال، سدرہ امین، سیدہ عروب شاہ اور تسمیہ رباب شامل ہیں۔