ٹی ٹوئنٹی ورلڈکپ کے لیے بنگلا دیش کرکٹ ٹیم کے بھارت نہ جانےکے معاملے پر ڈیڈ لاک برقرار ہے۔
وینیو کے حوالے سے آئی سی سی اور بنگلا دیش کرکٹ بورڈ کے درمیان ویڈیو کانفرنس بے نتیجہ رہی اور بنگلا دیش ایک بار پھر اپنے میچز بھارت سے منتقل کرنے کے مؤقف پر ڈٹا رہا۔
آئی سی سی کاکہنا ہےکہ ٹورنامنٹ کا شیڈول پہلے ہی طے ہو چکا ہے جس پر بی سی بی کا کہنا تھا کہ دونوں فریقین نے ممکنہ حل کی تلاش کے لیے بات چیت جاری رکھنے پر اتفاق کیا۔
بی سی بی کے مطابق بنگلادیش کرکٹ بورڈ کے مؤقف اور فیصلے میں کوئی تبدیلی نہیں، آئی سی سی نے بی سی بی سے اپنے مؤقف پر نظرثانی کرنے کی درخواست کی ہے۔
بی سی بی کے مطابق کھلاڑیوں، آفیشلز، اسٹاف کی حفاظت کے لیے آئی سی سی سے تعمیری رابطے کی کمٹمنٹ پر قائم ہیں۔
یاد رہے کہ ہندو انتہا پسندوں کے دباؤ کے بعد بنگلا دیش کے فاسٹ بالر مستفیض الرحمان کو بھارتی بورڈ نے آئی پی ایل سے ریلیز کردیا تھا اور دھمکیوں کے بعد بنگلا دیش کرکٹ بورڈ نے ٹیم کو بھارت نہ بھیجنے کا اعلان کر رکھا ہے جبکہ بی سی بی کو تاحال آئی سی سی کی جانب سے جواب کا انتظار ہے۔